वीरगंज (पर्सा), २८ वैशाख । सवारी दुर्घटनामा गम्भीर घाइते एक पैदल यात्रुको उपचारका क्रममा मृत्यु भएपछि फरार सवारी चालकलाई घटनाको २१ बर्ष पछि प्रहरीले पक्राउ गरेको छ । पक्राउ पर्ने पर्सागढी नगरपालिका–५ पचरुखी बस्ने बर्ष ४७ का दिनेश प्रसाद यादव हुन् ।
जिल्ला प्रहरी कार्यालय पर्साका अनुसार विसं २०६२ साल मंसिर १५ गते हालको महानगरपालिका –१४ चिनीमिल आवास क्षेत्र अगाडिको सडकखण्डमा दुर्घटना भएको थियो । यादवले चलाएको ना ३ प ६३६२ नम्बरको मोटरसाइकलले पैदल यात्री बाराको जीतपुरसीमरा उपमहानगरपालिका– २० बस्ने बर्ष ६५ को कालिका सिंह राजपुतलाई ठक्कर दिएको थियो ।
दुर्घटनामा गम्भीर घाइते भएका राजपुतलाई तत्काल उपचारका लागि ललितपुरस्थित बी एण्ड बी अस्पताल पठाइएकोमा उपचारकै क्रममा घटनाको ११ दिन पछि राजपुतको मृतु भएको थियो । दुर्घटनापछि मोटरसाइकल चालक यादव फरार थिए । प्रहरीका अनुसार विशेष सूचनाको आधारमा यादवलाई वडा प्रहरी कार्यालय श्रीपुरबाट खटिएको टोलीले सोमवार बिहान उनकै घरबाट पक्राउ गरेको हो ।
पक्राउ परेका चालकविरुद्ध सवारी ज्यान सम्बन्धी कसुरमा थप अनुसन्धान भइरहेको जिल्ला प्रहरी कार्यालय पर्साले जनाएको छ । 
प्रतिक्रिया दिनुहोस् !