वीरगंज (पर्सा), २६ वैशाख । पर्सा जिल्ला अदालतले ‘कानून दिवस २०८३’ को अवसरमा सम्पूर्ण नेपाली दाजुभाइ तथा दिदीबहिनीमा हार्दिक शुभकामना व्यक्त गरेको छ । अदालतले प्रधान न्यायालय ऐन, २००८ विक्रम संवत् २००९ वैशाख २६ गतेदेखि लागू भएको ऐतिहासिक दिनको स्मरणमा प्रत्येक वर्ष वैशाख २६ गते कानून दिवस मनाइँदै आएको उल्लेख गरेको छ ।
अदालतद्वारा जारी शुभकामना सन्देशमा नेपालमा विधिको शासन, न्याय, समानता तथा संवैधानिक मूल्य–मान्यताको संरक्षण र प्रवद्र्धन गर्ने उद्देश्यले यो दिवस मनाउने परम्परा रहेको जनाइएको छ । कानून दिवसलाई केवल औपचारिक कार्यक्रमका रूपमा नभई नागरिक अधिकार, कर्तव्य, न्यायिक स्वतन्त्रता तथा लोकतान्त्रिक मूल्यमान्यताको संरक्षणप्रति सामूहिक प्रतिबद्धता जनाउने महत्वपूर्ण अवसरका रूपमा व्याख्या गरिएको छ ।
सन्देशमा न्याय सम्पादन गर्ने निकाय, कानून व्यवसायी, सुरक्षाकर्मी, राष्ट्रसेवक कर्मचारी तथा आम नागरिकलाई आफ्नो जिम्मेवारी इमानदारी, निष्पक्षता र उत्तरदायित्वका साथ निर्वाह गर्न यस दिवसले प्रेरणा प्रदान गर्ने अपेक्षा व्यक्त गरिएको छ ।
त्यसैगरी समाजमा विद्यमान अन्याय, विभेद, हिंसा, भ्रष्टाचार तथा दण्डहीनताको अन्त्य गर्दै विधिको सर्वोच्चता स्थापित गर्न सबै पक्षबीच सहकार्य, समन्वय र पारदर्शिता अझ सुदृढ हुनुपर्नेमा अदालतले जोड दिएको छ ।
अदालतले स्वतन्त्र न्यायपालिका, विधिको शासन, संवैधानिक सर्वोच्चता तथा लोकतान्त्रिक मूल्य मान्यताप्रति प्रतिबद्ध रहँदै निष्पक्ष, सक्षम र प्रभावकारी न्याय प्रणालीको विकाससँगै न्यायमा सबै नागरिकको सहज पहुँच सुनिश्चित गर्नुपर्ने आवश्यकता पनि औंल्याएको छ ।
अन्त्यमा प्राकृतिक न्यायको सिद्धान्तको पूर्ण पालना गर्दै न्यायिक निर्णयको प्रभावकारी कार्यान्वयनलाई पनि उत्तिकै महत्वपूर्ण मानिएको उल्लेख गर्दै पर्सा जिल्ला अदालतका श्रेस्तेदार प्रभाकर कुमार मल्लिक ले सम्बन्धित निकाय, नागरिक समाज, कानून व्यवसायी, जनप्रतिनिधि तथा सम्पूर्ण सरोकारवालाबीच सहकार्य आवश्यक रहेको बताएका छन् । 
प्रतिक्रिया दिनुहोस् !