वीरगंज (पर्सा), २६ वैशाख । नेपाली कम्युनिष्ट पार्टी (नेकपा)का सह–संयोजक तथा पूर्व प्रधानमन्त्री माधवकुमार नेपाल शनिबार वीरगंज आएका छन् । गृह जिल्ला रौतहटको कार्यक्रम सम्पन्न गरेर वीरगंज पुगेका नेता नेपालले हालै अदालतको आदेशबाट रिहा भएका नेकपा नेता मनोज चौधरीसँग भेटवार्ता गरेका हुन् ।
पूर्व प्रधानमन्त्री नेपाल वीरगंजस्थित पानीटंकीमा रहेको चौधरी निवासमै पुगेर उनीसँग भेट गरेका थिए । भेटका क्रममा उनले चौधरी पक्राउ परेको घटनाबारे विस्तृत जानकारी लिँदै घटनाको वास्तविक अवस्थाप्रति चासो व्यक्त गरेका थिए । साथै पछिल्लो राजनीतिक परिस्थिति, पक्राउ प्रकरण र त्यसपछि विकसित घटनाक्रमबारे पनि दुई नेताबीच छलफल भएको बताइएको छ ।
यसअघि पनि नेता नेपालले मनोज चौधरी प्रहरी हिरासतमा रहेका बेला जिल्ला प्रहरी कार्यालय पर्सामा पुगेर भेट गरेका थिए । त्यस अवसरमा उनले घटनाबारे जानकारी लिनुका साथै कानुनी प्रक्रियामाथि समेत चासो देखाएका थिए ।
नेकपा नेता चौधरी प्रतिनिधि सभा सदस्य निर्वाचन हुनुभन्दा दुई दिनअघि पक्राउ परेका थिए । पर्सा क्षेत्र नं. २ बाट प्रतिनिधि सभा सदस्यका उम्मेदवारसमेत रहेका चौधरी सवार गाडीबाट विस्फोटक पदार्थजस्तो देखिने शंकास्पद वस्तु फेला परेको आरोपमा प्रहरीले उनलाई नियन्त्रणमा लिएको थियो ।
पर्सा जिल्ला अदालतको आदेशपछि पुर्पक्षका लागि वीरगंज कारागारमा रहेका चौधरी दुई महिना ६ दिनपछि उच्च अदालत जनकपुरको अस्थायी इजलास वीरगंजको आदेशमा बिहीबार रिहा भएका हुन् । चौधरी रिहा भएपछि उनलाई भेट्न पूर्व प्रधानमन्त्री नेपाल स्वयं वीरगंज पुगेपछि स्थानीय राजनीतिक वृत्तमा यस घटनालाई अर्थपूर्ण रूपमा हेरिएको छ । 
प्रतिक्रिया दिनुहोस् !