होटलभित्र युवतीको रहस्यमय मृत्युः तीनजना पक्राउ, घाँटीमा दाग भेटिएपछि शंकास्पद, अनुसन्धान तीव्र

निजगढ (बारा), २६ वैशाख । बाराको निजगढ–९ स्थित बुद्ध चोकमा रहेको गुरुङ होटलको कोठाभित्र एक युवती मृत फेला परेकी छन्। निजगढ–१२ की २५ वर्षीया सीता थिङ्ग शुक्रबार राति होटलमै मृत अवस्थामा भेटिएपछि घटना शंकास्पद बनेको छ । घटनापछि प्रहरीले अनुसन्धान तीव्र पार्दै निजगढ–९ की १८ वर्षीया अनु सुनार, जीतपुरसिमरा–१६ का ३५ वर्षीय महेश ओझा र ३६ वर्षीय सुनिल बम्जनलाई नियन्त्रणमा लिएको छ ।

प्रहरीका अनुसार सीता आफ्ना साथीहरूसँगै शुक्रबार साँझ होटल पुगेकी थिइन् । राति करिब ११ बजे उनी अचेत अवस्थामा भेटिएपछि तत्काल निजगढस्थित सामुदायिक अस्पताल लगिएको भए पनि चिकित्सकले उनलाई मृत घोषणा गरेका थिए । प्रारम्भिक अनुसन्धानमा मृतकको घाँटीमा दाग देखिएकाले मृत्यु शंकास्पद रहेको प्रहरीले जनाएको छ ।

बाराका प्रहरी प्रवक्ता तथा प्रहरी नायब उपरीक्षक विजयराज पण्डितका अनुसार सीता महेश ओझासँगै होटल पुगेकी थिइन् । साथै अनु सुनार र सुनिल बम्जन पनि उनीहरूसँगै होटलमा उपस्थित थिए । सीसीटीभी फुटेजअनुसार उनीहरू साँझ करिब साढे सात बजे होटल प्रवेश गरेका थिए । होटलमा बसेर मदिरा सेवन तथा खाना खाएपछि उनीहरू छुट्टाछुट्टै कोठामा गएका थिए । महेश र सीता एउटै कोठामा रहेका थिए भने अन्य दुई जना अर्को कोठामा बसेका थिए ।

प्रहरी विवरणअनुसार राति करिब ११ बजे महेशले अर्को कोठामा रहेकी सीताको साथीलाई बोलाएका थिए । त्यस क्रममा सीताले बाथरुममा झुण्डिने प्रयास गरेको बताउँदै महेशले एम्बुलेन्स बोलाउन जाने भन्दै होटलबाट मोटरसाइकल लिएर फरार भएको खुलेको छ । होटल सञ्चालकलाई समेत बिरामी साथी रहेको भन्दै एम्बुलेन्स लिन जानुपर्ने जानकारी दिएको प्रहरीले जनाएको छ ।

त्यसपछि महेशसँगै आएका सुनिल बम्जन पनि सीता अचेत अवस्थामा देखिएपछि घटनास्थलबाट फरार भएका थिए । घटनाबारे अनु सुनारले होटल सञ्चालकलाई जानकारी गराएपछि प्रहरीले तत्कालै घटनास्थलमा पुगेर अनुसन्धान सुरु गरेको हो ।

ईलाका प्रहरी कार्यालय निजगढका प्रहरी निरीक्षक जिवन लामिछानेको नेतृत्वमा टोली घटनास्थल पुगेको थियो भने जिल्ला प्रहरी कार्यालय बाराका प्रहरी उपरीक्षक नरेन्द्र कुँवर पनि रातिनै कलैयाबाट घटनास्थल पुगेका थिए ।

प्रहरीले तत्काल अनु सुनारलाई नियन्त्रणमा लिएर बयान लिएको छ भने फरार भएका महेश र सुनिलको खोजी सुरु गरेको थियो । खोजतलासका क्रममा सुनिल टांगियाबस्तीको जंगल क्षेत्रमा पक्राउ परेका थिए भने महेशलाई शनिबार बिहान ४ बजे निजगढ–७ माझी टोलस्थित आफन्तको घरबाट नियन्त्रणमा लिइएको प्रहरीले जनाएको छ ।

हाल तीनै जनालाई नियन्त्रणमा राखी अनुसन्धान अघि बढाइएको छ । मृतक सीताको शव पोष्टमार्टमका लागि पठाइएको छ । प्रहरीले पोस्टमार्टम रिपोर्टपछि मृत्युको वास्तविक कारण स्पष्ट हुने जनाएको छ ।