वीरगंज (पर्सा), २३ वैशाख । वीरगंज महानगरपालिका वडा नम्बर ३० मा सामाजिक अनुशासन कायम गर्न भन्दै गाउँ भेलाले कडा निर्णयहरू गरेको छ । बुधबार वडाध्यक्ष मनोज कुमार यादवको अध्यक्षतामा बसेको भेलाले विवाह, भोजलगायत कुनै पनि निजी वा सार्वजनिक कार्यक्रममा भोजपुरी अस्लिल गीत बजाउन पूर्ण प्रतिबन्ध लगाउने सर्वसम्मत निर्णय गरेको हो ।
वडाध्यक्ष यादवका अनुसार, उक्त निर्णय उल्लंघन गर्ने जो–कोहीलाई कारबाहीसहित नगद जरिवाना गरिनेछ । साथै, विवाहको जन्तीमा सम्बन्धित परिवारको अनुमति बिना प्रवेश गर्ने व्यक्तिलाई पनि नियन्त्रणमा लिएर जरिवाना गर्ने व्यवस्था गरिएको छ ।
गाउँमा बढ्दो अव्यवस्था नियन्त्रण गर्न अन्य कडा नियमहरू पनि लागू गरिएको छ । अब वडाभित्र सञ्चालनमा रहेका मदिरा पसलहरू बेलुकी ८ बजेभित्रै बन्द गर्नुपर्नेछ । त्यस्तै, राति १० बजेपछि आफ्नै घर बाहेक गाउँमा अनावश्यक रूपमा हिँडडुल गर्न नपाइने तथा मदिरा सेवन गरी सार्वजनिक स्थलमा होहल्ला गर्नसमेत निषेध गरिएको छ । यी नियम उल्लंघन गर्ने व्यक्तिलाई सुरक्षाकर्मीको सहयोगमा नियन्त्रणमा लिएर कारबाही गरिने जनाइएको छ ।
वडाध्यक्ष यादवले पछिल्लो समय गाउँमा सामाजिक परम्पराको नाममा विकृति बढ्दै गएको, मदिरा सेवनपछि झैझगडा हुने घटनामा वृद्धि भएको र समग्र सामाजिक वातावरण प्रभावित हुन थालेपछि यस्तो निर्णय लिन बाध्य भएको बताए । उक्त गाउँ भेलामा जनप्रतिनिधि, नेपाल प्रहरीका प्रतिनिधि, राजनीतिक दलका स्थानीय अगुवा, समाजसेवी तथा युवाहरूको उल्लेख्य सहभागिता रहेको थियो । 
प्रतिक्रिया दिनुहोस् !