जितपुरसिमरा (बारा), २२ वैशाख । जीतपुरसिमरा उपमहानगरपालिकाले सेवा प्रवाहलाई अझ सहज, छिटो र नागरिकमैत्री बनाउन वडास्तरमै प्रशासनिक अधिकार विस्तार गरेको छ । प्रमुख प्रशासकीय अधिकृत डमरु प्रसाद निरौलाको हस्ताक्षरमा जारी निर्णयअनुसार वडा कार्यालयहरूलाई विभिन्न प्रशासनिक जिम्मेवारी प्रदान गरिएको हो ।
यस नयाँ व्यवस्थासँगै अब सामान्य प्रशासनिक कामका लागि सेवाग्राहीले उपमहानगरको मुख्य कार्यालयसम्म धाउनुपर्ने बाध्यता घट्ने भएको छ । नागरिकहरूले आफ्नै वडा कार्यालयबाटै धेरैजसो सेवाहरू प्राप्त गर्न सक्ने व्यवस्था मिलाइएको उपमहानगरपालिकाले जनाएको छ ।
निर्णयअनुसार वडा कार्यालयहरूले एक करोड रुपैयाँसम्मको व्यवसाय दर्ता, नवीकरण तथा इजाजतपत्र जारी गर्ने अधिकार पाएका छन् । साथै घरधनी र भाडामा बस्ने पक्षबीचको सम्झौता अभिलेखीकरण, बहाल करको अनुगमन तथा असुली, र राजस्वसम्बन्धी समस्या समाधान तथा समन्वय गर्ने जिम्मेवारी पनि वडालाई दिइएको छ ।
त्यसैगरी नक्सा पाससँग सम्बन्धित प्राविधिक विवरण तथा अभिलेख वडा तहमा सुरक्षित राख्ने व्यवस्था गरिएको छ । नक्सा दर्ता, नवीकरण र स्वीकृतिको प्रारम्भिक प्रक्रिया समेत अब वडाबाटै अघि बढाइने भएको छ ।
जन्म, मृत्यु, विवाह, सम्बन्ध विच्छेद तथा बसाइँसराइ जस्ता व्यक्तिगत घटनाहरूको दर्ता र अभिलेख व्यवस्थापन पनि वडा कार्यालयबाटै हुने व्यवस्था गरिएको छ । यी सबै विवरणहरू अनलाइन प्रणालीसँगै भौतिक दर्ता किताबमा समेत व्यवस्थित रूपमा राखिनेछ । साथै जनसंख्या व्यवस्थापन र सामाजिक सुरक्षासम्बन्धी आवधिक प्रतिवेदन तयार पार्ने जिम्मेवारी पनि वडालाई दिइएको छ ।
उपमहानगरपालिकाले यस कदमले सेवा प्रवाहलाई थप प्रभावकारी बनाउनुका साथै नागरिकको समय र खर्च दुवैमा उल्लेखनीय बचत हुने अपेक्षा व्यक्त गरेको छ । 
प्रतिक्रिया दिनुहोस् !