पथलैया (बारा), २१ वैशाख । पथलैया चोक– बारा प्रहरीले पथलैयाबाट ठूलो परिमाणमा गाँजासहित दुई जनालाई नियन्त्रणमा लिएको छ । जिल्ला प्रहरी कार्यालय बाराका अनुसार आइतबार राति करिब ८ः२० बजे ट्राफिक अफिस अगाडि नियमित जाँचका क्रममा उक्त बरामदगी गरिएको हो ।
हेटौँडाबाट पथलैयातर्फ आइरहेको बा.प्र.०३–००३ प ५७६४ नम्बरको स्कुटर रोकेर जाँच गर्दा करिब २१ केजी गाँजा फेला परेको प्रहरीले जनाएको छ । स्कुटरको अगाडि खुट्टा राख्ने भागमा कालो प्लास्टिकले बेरेर लुकाइएको अवस्थामा लागूऔषध बरामद गरिएको हो ।
प्रहरी चौकी पथलैया बाट प्रहरी वरिष्ठ नायब निरीक्षक युवराज दाहाल को नेतृत्वमा खटिएको टोलीले सो गाँजा फेला पारेको थियो । घटनामा संलग्न भएको आरोपमा मकवानपुर छतिवन गाउँपालिका–४ का १६ वर्षीय सुरेन्द्र गोले (स्कुटर चालक) र मकवानपुर राक्सिराङ गाउँपालिका–७ का १८ वर्षीय सलमान गुरुङ लाई प्रहरीले नियन्त्रणमा लिएको छ ।
पक्राउ परेका दुवै जनामाथि बारा जिल्ला अदालत बाट म्याद थप गरी थप अनुसन्धान अघि बढाइएको सुरेशराज भट्टले जानकारी दिएका छन् । 
प्रतिक्रिया दिनुहोस् !