वीरगंज (पर्सा), २० वैशाख । नेशनल मेडिकल कलेजद्वारा आयोजना गरिएको ‘प्रथम नेशनल इन्टरमेडिकल बेसिक साइन्स क्विज’ प्रतियोगिता शनिबार सम्पन्न भएको छ । कलेजको सभाहलमा आयोजित उक्त प्रतियोगितामा देशभरका विभिन्न मेडिकल कलेजका विद्यार्थीहरूले उल्लेख्य सहभागिता जनाउँदै आफ्नो बौद्धिक क्षमता प्रस्तुत गरेका थिए ।
देशका ११ वटा मेडिकल कलेजबाट ६८ जना विद्यार्थी सहभागी भएको प्रतिस्पर्धामा कडा प्रतिस्पर्धापछि महाराजगञ्ज मेडिकल क्याम्पसले प्रथम स्थान हासिल गरेको छ । त्यसैगरी पाटन एकेडेमी अफ हेल्थ साइन्स दोस्रो र बी.पी. कोइराला इन्स्टिच्युट अफ हेल्थ साइन्स तेस्रो स्थानमा रहन सफल भएका छन् ।
विजेता टोलीलाई नगद पुरस्कारसहित ट्रफी, मेडल र प्रमाणपत्र प्रदान गरिएको कलेजका प्रेस सल्लाहकार आंशिक अन्सारीले जानकारी दिए । उनका अनुसार प्रथम स्थान हासिल गर्ने टोलीलाई ५० हजार रुपैयाँ, दोस्रोलाई २५ हजार रुपैयाँ र तेस्रोलाई १५ हजार रुपैयाँ प्रदान गरिएको थियो ।
कार्यक्रम नेशनल मेडिकल कलेजका अध्यक्ष प्रो. डा. जैनुद्दिन अन्सारीको अध्यक्षतामा सम्पन्न भएको थियो भने प्रमुख अतिथिका रूपमा पर्साका प्रमुख जिल्ला अधिकारी भोला दहालको उपस्थिति रहेको थियो । कार्यक्रमको प्रारम्भ कलेजका प्रबन्ध निर्देशक शाहनवाज अन्सारीको स्वागत मन्तव्यबाट भएको थियो ।
उक्त अवसरमा नेपाल आर्मी पर्साका प्रमुख सेनानी लोकेन्द्र कार्की तथा जिल्ला प्रहरी कार्यालय पर्साका प्रहरी निरीक्षक शैलेन्द्र खड्कालगायत सुरक्षा निकायका प्रतिनिधिहरूको समेत उपस्थिति रहेको थियो ।
कार्यक्रम सफल बनाउन कलेजका एकेडेमिक निर्देशक डा. रुबी श्रेष्ठ (यास्मिन), मार्केटिङ तथा एडमिसन निर्देशक आविद हुसैन अन्सारी, अस्पताल निर्देशक डा. इशरत जहाँ अन्सारी, भाइस प्रिन्सिपल रवि शंकर गुप्ता, नर्सिङ क्याम्पसकी भाइस प्रिन्सिपल डा. बबिता सिंह लगायत प्राध्यापक तथा कर्मचारीहरूको सक्रिय भूमिका रहेको थियो ।
आयोजकका अनुसार यस्ता बौद्धिक प्रतिस्पर्धाहरूले विद्यार्थीहरूबीच ज्ञान आदान–प्रदानलाई प्रोत्साहन गर्नुका साथै मेडिकल शिक्षामा नयाँ ऊर्जा थप्ने अपेक्षा गरिएको छ ।
प्रतिक्रिया दिनुहोस् !