वीरगंज (पर्सा), ८ वैशाख । जिल्ला प्रहरी कार्यालय पर्साले विशेष सूचनाको आधारमा वीरगंज महानगरपालिका–८ लिंक रोडस्थित एक होटलबाट ठूलो परिमाणमा लागुऔषधसहित एक भारतीय नागरिकलाई पक्राउ गरेको छ ।
मंगलबार अपराह्न करिब ३ः५५ बजे प्रहरी टोलीले लागूऔषध ओसारपसार भइरहेको सूचनापछि होटलमा छापा मार्दा भारत बिहारको मोतिहारी जिल्ला भेलाही गाउँ बस्ने २० वर्षीय सागर कुमार पटेललाई नियन्त्रणमा लिएको हो ।
प्रहरीले उनको कोठा खानतलासी गर्दा प्रतिबन्धित लागूऔषध ट्रामाडोल ३० हजार ट्याब्लेट बरामद गरेको जनाएको छ । बरामद औषधि विभिन्न पातामा प्याक गरिएको अवस्थामा फेला परेको थियो । पक्राउ परेका पटेलमाथि लागूऔषध सम्बन्धी कसुरमा आवश्यक अनुसन्धान भइरहेको प्रहरीले जनाएको छ ।
सीमावर्ती क्षेत्रमा लागूऔषध ओसारपसार बढ्दै गएको सन्दर्भमा प्रहरीले निगरानी र कारबाहीलाई थप कडाइ गर्ने संकेत दिएको छ ।
प्रतिक्रिया दिनुहोस् !