वीरगंज (पर्सा), ७ वैशाख । पर्सा राष्ट्रिय निकुञ्जमा वन्यजन्तु संरक्षणलाई थप प्रभावकारी बनाउने उद्देश्यले वन्यजन्तु उद्धार केन्द्र सञ्चालनमा ल्याइएको छ । ३१औँ वन्यजन्तु सप्ताह २०८३ को अवसरमा आयोजित कार्यक्रममा सरोकारवालाबीच अन्तरक्रिया गर्दै संरक्षण अभियानलाई सुदृढ बनाउने प्रतिबद्धता व्यक्त गरिएको हो ।
‘सुरक्षित मानिस, संरक्षित वन्यजन्तु’ भन्ने मूल नारासहित स्थापना गरिएको उक्त उद्धार केन्द्रले घाइते, बस्तीमा पसेका तथा जोखिममा परेका वन्यजन्तुको उद्धार, उपचार र पुनःस्थापनामा महत्वपूर्ण योगदान पुर्याउने विश्वास लिइएको छ । निकुञ्जका वरिष्ठ संरक्षण अधिकृत रामचन्द्र खतिवडाले संरक्षण कार्यमा स्थानीय समुदायको सहभागिता बढ्दै जानु सकारात्मक पक्ष भएको बताए ।
उनले विकास र संरक्षणबीच सन्तुलन कायम गर्नु अहिलेको प्रमुख चुनौती भएको उल्लेख गरे । उद्धार केन्द्र (हात्तीसार) को उद्घाटन राजन पौडेलले गरेका हुन् । उनले स्थानीय तह र निकुञ्ज प्रशासनबीच सहकार्य अझ सुदृढ बनाउनुपर्नेमा जोड दिँदै आवश्यक पर्दा नगर प्रहरी र पशु चिकित्सकमार्फत सहयोग उपलब्ध गराउने प्रतिबद्धता व्यक्त गरे ।
कार्यक्रममा सहभागीहरूले मानव–वन्यजन्तु द्वन्द्व न्यूनीकरण, अवैध सिकार नियन्त्रण तथा प्राकृतिक स्रोतको दिगो उपयोगमा विशेष ध्यान दिनुपर्ने धारणा राखेका थिए । साथै सञ्चारकर्मीहरूलाई तथ्यपरक र जिम्मेवार सामग्रीमार्फत संरक्षण सन्देश जनस्तरसम्म पुर्याउन आग्रह गरिएको थियो । कार्यक्रमअघि सञ्चारकर्मीहरूलाई निकुञ्ज क्षेत्रको स्थलगत अवलोकन गराइएको आयोजकले जनाएको छ ।
प्रतिक्रिया दिनुहोस् !