वीरगंज (पर्सा), २९ चैत । वीरगंज महानगरपालिका–१० स्थित डेरामा बस्दै आएकी एक युवती मृत अवस्थामा फेला परेकी छन् । रौतहटको दिपही घर भएकी २० वर्षीया माही गुप्ता, जसलाई पवन कुमारी गुप्ताका रूपमा पनि चिनिन्थ्यो, आइतबार बिहान आफ्नै कोठाभित्र झुन्डिएको अवस्थामा मृत भेटिएको प्रहरीले जनाएको छ ।
प्रहरीका अनुसार घटनाबारे जानकारी प्राप्त हुनासाथ टोली घटनास्थलमा पुगेर अनुसन्धान सुरु गरेको थियो । प्रारम्भिक विवरणले उनी पासो लगाएको अवस्थामा फेला परेको देखाएको छ । मोडलिङ क्षेत्रमा सक्रिय रहँदै आएकी माही सामाजिक सञ्जाल टिकटकमार्फत पनि चर्चामा रहँदै आएकी थिइन् । उनी आफ्नै गाउँका विवेक गुप्तासँग प्रेम विवाहमा बाँधिएकी थिइन् । तर पछिल्ला दिनहरूमा वैवाहिक सम्बन्धमा चर्को तनाव देखिएको र श्रीमानले दोस्रो विवाहको तयारी गरिरहेको भन्ने सूचना सार्वजनिक भएको छ । यसै कारण उनी गम्भीर मानसिक दबाबमा रहेको उनका नजिकका साथीहरूले बताएका छन् ।
आत्महत्या अघि उनले टिकटकमा भिडियो पोस्ट गर्दै आफ्नो पीडा र भावनात्मक अवस्था व्यक्त गरेकी थिइन्, जसले घटनालाई थप संवेदनशील बनाएको छ । घटनाको विषयमा जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले आवश्यक अनुसन्धान अघि बढिरहेको जानकारी दिएका छन् ।
प्रतिक्रिया दिनुहोस् !