वीरगंज (पर्सा), २६ चैत । पर्साको छिपहरमाई गाउँपालिका–२ टिहुकीमा विद्यालयको बाउन्ड्री वाल निर्माणलाई लिएर दुई पक्षबीच भएको विवादले झडपको रूप लिँदा चार जना घाइते भएका छन् । इलाका प्रहरी कार्यालय पोखरीया का प्रहरी निरीक्षक प्रदीप पौडेलका अनुसार श्री ने.रा.प्रा.वि. टिहुकीको बाउन्ड्री वाल निर्माणबारे भइरहेको छलफल (पंचायती) का क्रममा विवाद चर्किँदै कुटाकुटमा परिणत भएको हो ।
झडपमा बडकी टिहुकीका ४० वर्षीय रमेश साह, २० वर्षीय राजकुमार गिरी, ४३ वर्षीय संजय साह कानु र ४९ वर्षीय बुचुन मियाँ घाइते भएका छन् । घाइतेमध्ये रमेश साह र राजकुमार गिरीको टाउकोमा गम्भीर चोट लागेको प्रहरीले जनाएको छ । घाइतेहरूलाई प्रारम्भिक उपचारका लागि नारायणी अस्पताल लगिएको थियो भने अवस्था जटिल देखिएपछि थप उपचारका लागि वीरगंज न्युरो अस्पताल रिफर गरिएको छ ।
स्थानीयका अनुसार विद्यालय नजिकैको सिँचाइ जमिन समेटेर बाउन्ड्री वाल निर्माण गर्न खोजिएको विषयमा विवाद उत्पन्न भएको हो । विद्यालय प्रशासनले आफ्नो स्वामित्वभित्रको जग्गामा मात्र पर्खाल बनाउन खोजे पनि केही स्थानीय राजनीतिक व्यक्तिहरूले अतिरिक्त जमिन समेट्न दबाब दिएपछि विवाद चर्किएको बताइएको छ । घटनामा संलग्न व्यक्तिहरू झडपपछि फरार रहेका छन्। उनीहरूको खोजी कार्य जारी रहेको प्रहरीले जनाएको छ । 
प्रतिक्रिया दिनुहोस् !