वीरगंज (पर्सा), २६ चैत । बढ्दो लैङ्गिक तथा डिजिटल हिंसाले समाजमा गम्भीर चुनौती सिर्जना गरिरहेको भन्दै बारा र पर्साका महिला जनप्रतिनिधिहरूले गहिरो चिन्ता व्यक्त गरेका छन् । उनीहरूले यस्तो हिंसाको नियन्त्रणका लागि स्पष्ट नीति, व्यापक जनचेतना र सुरक्षित डिजिटल अभ्यास अपरिहार्य भएकोमा जोड दिएका छन् ।
वीरगंजमा महिला पुनर्स्थापना केन्द्र (ओरेक) नेपाल द्वारा आयोजित लैङ्गिक उत्तरदायित्व, समावेशी शासन तथा डिजिटल हिंसासम्बन्धी तीन दिने तालिममा सहभागी जनप्रतिनिधिहरूले हिंसाका विभिन्न रूप, त्यसका कारण र नियन्त्रणका उपायबारे विस्तृत छलफल गरेका छन् । छलफलका क्रममा प्रभावकारी नीति निर्माणसँगै त्यसको कडाइका साथ कार्यान्वयन गर्नुपर्ने आवश्यकता औंल्याइएको छ ।
बिहीबारदेखि सुरु भएको उक्त तालिममा बाराको आदर्शकोतवाल गाउँपालिका र पर्साका वीरगंज महानगरपालिका, पकाहमैनपुर तथा बिन्दबासिनी गाउँपालिकाका निर्वाचित महिला प्रतिनिधिहरूको सहभागिता रहेको छ । सहभागीहरूले विशेषगरी सामाजिक सञ्जालमार्फत हुने दुर्व्यवहार, अपमानजनक अभिव्यक्ति र चरित्र हत्या जस्ता घटनाहरू बढ्दै गएको भन्दै त्यसबाट जोगिने उपाय तथा कानुनी प्रावधानबारे जानकारी अपरिहार्य भएको बताएका छन् ।
ओरेक नेपालकी परियोजना संयोजक मिलन कार्कीका अनुसार महिला जनप्रतिनिधिहरूलाई उनीहरूको अधिकार, कर्तव्य र जिम्मेवारीबारे स्पष्ट बनाउन तालिम सञ्चालन गरिएको हो । उनले डिजिटल माध्यमको सुरक्षित तथा प्रभावकारी प्रयोग, अनलाइन हिंसाबाट जोगिने उपाय र डिजिटल साक्षरता अभिवृद्धिमा विशेष ध्यान दिइएको जानकारी दिइन् ।
तालिममा सहभागी विज्ञ गीता सुवेदीले स्थानीय तहमा नीति तथा कार्यक्रम कार्यान्वयन, लैङ्गिक संवेदनशील योजना निर्माण र पालिकाबीच सहकार्यका विषयमा प्रशिक्षण दिइरहेकी छन् । उनका अनुसार डिजिटल प्लेटफर्मले अवसरसँगै चुनौती पनि थपेको छ, तर सही रूपमा प्रयोग गर्न सके यसले महिलाको आवाज सशक्त बनाउने प्रभावकारी माध्यम बन्न सक्छ ।
त्यस्तै, ओरेक नेपालकी मधेश प्रदेश संयोजक बीना कुमारी सिंहले तालिममा लैङ्गिक हिंसा न्यूनीकरणमा जनप्रतिनिधिको भूमिका, लैङ्गिकमैत्री बजेट निर्माण तथा समावेशी योजना तर्जुमा जस्ता महत्वपूर्ण विषय समेटिएको बताइन् । ओरेक नेपालले मधेशसहित कर्णाली र सुदूरपश्चिम प्रदेशका विभिन्न स्थानीय तहमा महिला सशक्तीकरण र लैङ्गिक हिंसा नियन्त्रणका कार्यक्रम सञ्चालन गर्दै आएको छ ।
तीन दिनसम्म सञ्चालन हुने यस तालिमले महिला जनप्रतिनिधिहरूको क्षमता अभिवृद्धि गर्दै स्थानीय तहमा लैङ्गिकमैत्री नीति निर्माण र सुरक्षित डिजिटल वातावरण प्रवद्र्धनमा ठोस योगदान पुर्याउने विश्वास आयोजकले व्यक्त गरेका छन् । 
प्रतिक्रिया दिनुहोस् !