वीरगंज (पर्सा), १६ चैत । जिल्ला प्रहरी कार्यालय पर्साले ठूलो परिमाणको लागुऔषध गाँजासहित तीन जना भारतीय नागरिकलाई पक्राउ गरेको छ । उनीहरूलाई वीरगंज महानगरपालिका–१६ स्थित शंकराचार्य गेट नजिकबाट पक्राउ गरिएको हो ।
प्रहरी चौकी इनर्वाबाट खटिएको नियमित चेकिङ टोलीले वीरगंजबाट रक्सौलतर्फ पैदल जाँदै गरेका व्यक्तिहरूलाई शंकास्पद अवस्थामा देखेपछि खानतलासी गरेको थियो । सो क्रममा उनीहरूले शरीरको पेट र छातीमा रातो प्लास्टिकमा नीलो डोरीले बेरेर लुकाइछिपाई लैजाँदै गरेको अवस्थामा गाँजा बरामद गरिएको प्रहरीले जनाएको छ ।
पक्राउ पर्नेहरूमा भारत बिहार राज्य बेतिया जिल्ला बगाहा–रतनमाला बस्ने ३९ वर्षीय जाबेद अन्सारी, बसवरिया–धुनियापट्टी बस्ने २४ वर्षीय महमद रजिश, र छाउनी बस्ने २८ वर्षीय महमद गरिब रहेका छन् । प्रहरीका अनुसार उनीहरूको साथबाट कुल ७ किलो ६९२ ग्राम गाँजा बरामद गरिएको छ ।
पक्राउ परेका तीनै जनालाई नियन्त्रणमा लिई लागुऔषध सम्बन्धी कसूरमा थप अनुसन्धान भइरहेको जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक हरि बहादुर बस्नेतले जानकारी दिएका छन् ।
प्रतिक्रिया दिनुहोस् !