वीरगंज (पर्सा), १५ चैत । पर्सा जिल्लामा श्रीमतीमाथि क्रुर आक्रमण गरी गम्भीर घाइते बनाउने एक व्यक्ति पक्राउ परेका छन् । पर्सागढी नगरपालिका–३ बिरुवा टोलका करिब ३० वर्षीय विश्वनाथ सहनीले आफ्नै श्रीमती २५ वर्षीया हरिकला देवी सहनीमाथि धारिलो हतियार प्रहार गरी खुट्टा काटिदिएको घटनामा प्रहरीले उनलाई नियन्त्रणमा लिएको हो ।
जिल्ला प्रहरी कार्यालय पर्साका प्रमुख प्रहरी उपरीक्षक सुदिपराज पाठकका अनुसार २०८२ चैत १ गते बिहान करिब ८ः३० बजे घरायसी विवादका कारण सहनीले पूर्वयोजना बनाई अमानवीय ढंगले ‘दाउ’ प्रहार गर्दा श्रीमतीको बायाँ खुट्टा काटिएको थियो । घटनापछि उनी घाइतेलाई रगताम्मै अवस्थामा छाडेर फरार भएका थिए ।
घटनाको जानकारी प्राप्त हुनासाथ इलाका प्रहरी कार्यालय पटेर्वासुगौलीको टोली तथा स्थानीयवासीको सहयोगमा घाइते महिलालाई तत्काल उद्धार गरी एल.एस. न्यूरो एण्ड जेनेरल हस्पिटल प्रा.लि., परवानीपुर (बारा) मा उपचारका लागि पठाइएको थियो ।
प्रारम्भिक अनुसन्धानपछि फरार रहेका आरोपीलाई २०८२ चैत १४ गते दिउँसो करिब १२ः३० बजे सोही स्थानबाट जिल्ला प्रहरी कार्यालय पर्सा र प्रहरी चौकी बडनिहारको संयुक्त टोलीले पक्राउ गरेको हो । हाल पक्राउ परेका सहनीमाथि ज्यान मार्ने उद्योग तथा कुटपिट अंगभंगसम्बन्धी कसूरमा थप अनुसन्धान भइरहेको प्रहरी उपरीक्षक पाठकले जानकारी दिए ।
पीडित परिवारलाई आर्थिक सहयोग
श्रीमतीमाथि भएको क्रूर आक्रमणमा गम्भीर घाइते बनेकी हरिकला देवी सहनीका अभिभावकलाई आर्थिक सहयोग प्रदान गरिएको छ । पर्सागढी नगरपालिका–३, विरुवा टोल निवासी ३० वर्षीय विश्वनाथ सहनीले घरायसी विवादका कारण आफ्नी करिब २५ वर्षीया श्रीमतीमाथि धारिलो हतियार (दाउ) प्रहार गरी बायाँ खुट्टा काटिदिएपछि उनी गम्भीर अवस्थामा पुगेकी थिइन् ।
घटनापछि पीडित परिवारको आर्थिक अवस्था अत्यन्त कमजोर देखिएकाले जिल्ला स्तरीय लैङ्गिक हिंसा सञ्जाल समिति कोषबाट हरिकला देवीका बुवा आमालाई ५० हजार १०५ रुपैयाँ राहतस्वरूप उपलब्ध गराइएको हो । जिल्ला प्रहरी कार्यालय पर्साका प्रमुख प्रहरी उपरीक्षक सुदीप राज पाठकले उक्त रकमको चेक पीडितका अभिभावकलाई हस्तान्तरण गरेका हुन् ।
यस विषयमा जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले पीडित परिवारलाई सहयोग पुगोस् भन्ने उद्देश्यले उक्त रकम प्रदान गरिएको जानकारी दिएका छन् ।
प्रतिक्रिया दिनुहोस् !