वीरगंज (पर्सा), ४ चैत । वीरगंज–१६ नगवाकी खुश्बू श्रीवास्तवले आफू र परिवारमाथि बारम्बार आक्रमण हुँदापनि प्रहरी प्रशासनले बेवास्ता गरेको गम्भीर आरोप लगाएकी छन् । बुधबार आयोजित पत्रकार सम्मेलनमा उनले पटक–पटक उजुरी दिँदा पनि दोषीमाथि कारबाही नभएको भन्दै न्यायको माग गरेकी हुन् ।
उनका अनुसार भारतको बिहार राज्य अन्तर्गत चनपटियाका स्थायी बासिन्दा भई हाल वीरगंज–१६ मा बसोबास गर्दै आएका केही व्यक्तिहरूसँग पुरानो विवाद रहेको छ । सोही विवादकै कारण ती व्यक्तिहरूले आफ्नो परिवारमाथि निरन्तर आक्रमण गर्दै आएको उनको दाबी छ ।
श्रीवास्तवका अनुसार २०८२ असार २९ गते ती व्यक्तिहरू घरमै प्रवेश गरी कुटपिट गरेका थिए । उक्त घटनामा उनका श्रीमान गम्भीर घाइते भई दाहिने कानको करिब ७० प्रतिशत श्रवण क्षमता गुमेको उनले बताइन् । घटनापछि न्यायको अपेक्षासहित जिल्ला प्रहरी कार्यालय पर्सामा जाहेरी लिएर पुगेपनि आवश्यक छानबिन र कारबाही नभएको उनको गुनासो छ ।
न्याय नपाएपछि उनले उच्च अदालत जनकपुर अस्थायी इजलास वीरगंजमा रिट निवेदन दायर गरेकी थिइन् । अदालतबाट आफ्नो पक्षमा आदेश जारी भएपनि त्यसपछि पनि समस्या समाधान नभएको उनले बताइन् । उल्टै, पुनः घरमै आक्रमण हुँदा उनका श्रीमान र वृद्ध ससुरा घाइते भएको उनको दाबी छ । घटनापछि उनले प्रहरी चौकी, वडा प्रहरी कार्यालय हुँदै पुनः जिल्ला प्रहरी कार्यालय पर्सासम्म धाउँदा पनि मुद्दा दर्ता र अनुसन्धानमा ढिलाइ भएको आरोप लगाएकी छन् ।
सम्बन्धित निकायबाट आश्वासन मात्रै पाइए पनि ठोस कारबाही नभएको उनको भनाइ छ । श्रीवास्तवले प्रहरी प्रशासनको भूमिकामाथि प्रश्न उठाउँदै पीडितले न्याय नपाउँदा पनि किन मौन बसिएको भन्दै निष्पक्ष छानबिन गरी दोषीमाथि कारबाही गर्न माग गरेकी छन् ।
प्रतिक्रिया दिनुहोस् !