वीरगंज (पर्सा), ६ फागुन । पर्सा निर्वाचन क्षेत्र नम्बर–२ की उम्मेदवार रिमा यादवले बहुदरमाई नगरपालिका–३ अन्तर्गत नगरदाहा क्षेत्रमा बुधबार सघन घरदैलो अभियान सञ्चालन गरेकी छन् । टोल टोलमा पुगेर उनले स्थानीय मतदातासँग प्रत्यक्ष भेटघाट तथा संवाद गर्दै आफ्नो पक्षमा समर्थन जुटाउने प्रयास गरिन् ।
घरदैलोका क्रममा यादवले विकास, सुशासन र रोजगारी सृजनालाई आफ्नो चुनावी एजेन्डाको केन्द्रमा राखेको बताइन् । परिवर्तनको आवश्यकता औंल्याउँदै उनले मतदातालाई सूर्य छापमा मतदान गर्न आग्रह गरिन्। स्थानीय बासिन्दाले उनलाई आत्मीय स्वागत गर्दै मिठाइ खुवाएर शुभकामना व्यक्त गरेका थिए, जसले कार्यक्रमलाई थप उत्साहपूर्ण बनाएको थियो ।
कार्यक्रममा पार्टीका केन्द्रीय सदस्य विजय सरावगी, समानुपातिक उम्मेदवार विजय सरावगी, बहुदरमाई नगरप्रमुख सिंहासन साह, नेता शिव पटेल, पुरन कुर्मी, वडा अध्यक्ष सुरेन्द्र यादवलगायत सयौँ नेताकार्यकर्ताको सहभागिता रहेको थियो । अभियान टोलीले नगरदाहाका विभिन्न बस्ती र टोलमा पुगेर नागरिकसँग छलफल गर्दै उनीहरूका समस्या, सुझाव र अपेक्षाबारे जानकारी संकलन गरेको जनाएको छ ।
उम्मेदवार यादवले सडक पूर्वाधार सुदृढीकरण, स्वास्थ्य सेवाको विस्तार, गुणस्तरीय शिक्षा र कृषि क्षेत्रको आधुनिकीकरणलाई प्राथमिकतामा राख्ने प्रतिबद्धता व्यक्त गरिन् । विशेषगरी युवाहरूलाई लक्षित गरी रोजगारीका अवसर सिर्जना गर्ने योजना अघि सार्दै उनले क्षेत्रको समग्र आर्थिक सशक्तीकरणमा जोड दिइन् । केन्द्रीय सदस्य सरावगीले रिमा यादवलाई सक्षम, इमानदार र जनतासँग घनिष्ठ सम्बन्ध राख्ने उम्मेदवारका रूपमा प्रस्तुत गर्दै उनलाई विजयी गराउन मतदातासँग अपिल गरे। उनले यस क्षेत्रको दीर्घकालीन विकासका लागि दूरदर्शी नेतृत्व आवश्यक रहेको उल्लेख गरे ।
घरदैलोका क्रममा स्थानीयवासीले खानेपानी समस्या समाधान, सडक मर्मत, स्वास्थ्य सेवा विस्तार तथा बेरोजगारी न्यूनीकरणजस्ता विषय उठाएका थिए । प्रत्युत्तरमा यादवले ती मागलाई प्राथमिकताका साथ सम्बोधन गर्ने आश्वासन दिँदै जनताको विश्वासलाई परिणाममा रूपान्तरण गर्ने प्रतिबद्धता दोहोर्याइन् ।
निर्वाचन नजिकिँदै जाँदा क्षेत्र नम्बर–२ मा उम्मेदवारहरू सक्रिय रूपमा घरदैलो, भेटघाट र संवाद कार्यक्रममार्फत मतदाता आकर्षित गरिरहेका छन् । यसै क्रममा रिमा यादवले पनि निरन्तर रूपमा जनतामाझ पुग्ने र आफ्ना योजना स्पष्ट गर्दै समर्थन माग्ने अभियानलाई थप तीव्र बनाउने बताएकी छन् ।
प्रतिक्रिया दिनुहोस् !