वीरगंज (पर्सा), ४ फागुन । नेपाल कम्युनिस्ट पार्टी (एमाले) ले वीरगंज महानगरपालिका–१६ नगवामा प्रतिनिधिसभा निर्वाचनलाई केन्द्रमा राख्दै चुनाव प्रचार प्रसार तथा सम्पर्क कार्यालय सञ्चालनमा ल्याएको छ । सङ्गठन मजबुत बनाउने र जनसम्पर्क दायरा विस्तार गर्ने उद्देश्यसहित स्थापना गरिएको उक्त कार्यालयको उद्घाटन पर्सा निर्वाचन क्षेत्र नम्बर १ बाट प्रतिनिधिसभा सदस्यका उम्मेदवार प्रदीप यादवले रिबन काटेर गरेका हुन् ।
उद्घाटन समारोहलाई सम्बोधन गर्दै पूर्व मन्त्रीसमेत रहेका यादवले यसलाई वडा तहबाट सुरु गरिएको सशक्त जनसम्पर्क अभियानको प्रारम्भिक चरणका रूपमा चित्रण गरे । उनले एमाले वीरगञ्जलाई समृद्ध, व्यवस्थित, सफा र बस्न योग्य सहर बनाउने स्पष्ट लक्ष्यसहित अघि बढेको बताए । “शिक्षा र स्वास्थ्य क्षेत्रमा गुणस्तर सुधार हाम्रो प्राथमिकता हो । युवालाई रोजगारी तथा उद्यमशीलतामा जोड्ने वातावरण सिर्जना गरिनेछ । सडक, विद्युत्, खानेपानीजस्ता आधारभूत पूर्वाधारको विकासलाई तीव्रता दिँदै वीरगञ्जलाई औद्योगिक केन्द्रसँगै सम्भावनायुक्त पर्यटकीय गन्तव्यका रूपमा विकास गर्ने हाम्रो मुख्य एजेन्डा हो,” यादवले भने ।
आफ्नो विगतको संसदीय तथा मन्त्रीस्तरीय अनुभव स्मरण गर्दै उनले त्यस अवधिमा जनहितका विभिन्न सुधारात्मक कार्य अघि बढाएको दाबी गरे । “जनताको सेवामा रहँदा प्राप्त अनुभवलाई उपयोग गर्दै अब वीरगञ्जको समग्र विकासलाई नयाँ उचाइमा पुर्याउने प्रतिबद्धता व्यक्त गर्दछु। नागरिकको दैनिकी सहज बनाउनु नै मेरो प्राथमिक लक्ष्य हो,” उनले उल्लेख गरे ।
यादवले वीरगंज-१६ का मतदाता, शुभेच्छुक र समर्थकलाई नवस्थापित कार्यालयमा नियमित रूपमा आएर सुझाव र सल्लाह दिन आग्रह गर्दै अभियानमा सक्रिय सहभागिताका लागि आह्वान पनि गरे। उनका अनुसार जनताको साथ र सहयोगले पार्टीको अभियानलाई अझ प्रभावकारी बनाउनेछ । कार्यालय स्थापना भएसँगै एमालेले वीरगञ्ज–१६ सहित महानगरका अन्य वडामा पनि सङ्गठन विस्तार र जनसम्पर्क कार्यक्रमलाई तीव्र बनाउने जनाएको छ। उक्त कार्यालयलाई उम्मेदवार तथा कार्यकर्ताहरूको स्थायी सम्पर्क केन्द्रका रूपमा सञ्चालन गरिने जानकारी दिइएको छ ।
उद्घाटन कार्यक्रममा पूर्व सांसद प्रभु हजरा, निर्मला देवकोटा, क्षेत्रीय संयोजक मानदेव हजरा, सुन्दर कुर्मी, रामबाबु पासवान, अरुण यादव, भुसाल चौरसियालगायत नेता–कार्यकर्ताको उपस्थिति रहेको थियो । यसैबीच, आज बिहान वीरगंज-१८ सौराहामा तय गरिएको प्रदीप यादवको घरदैलो कार्यक्रम स्थानीय बलिस्टर यादवको निधनका कारण स्थगित गरिएको क्षेत्रीय कमिटीले जनाएको छ । पार्टीका नेताहरू स्वर्गीय यादवको अन्त्येष्टि कार्यक्रममा सहभागी हुने जानकारी पनि एमालेले दिएको छ ।
प्रतिक्रिया दिनुहोस् !