वीरगंज (पर्सा), ४ फागुन । हिन्दू धर्मावलम्बीहरूको महान् पर्व महाशिवरात्रि आइतबार वीरगंजसहित देशभर श्रद्धा, भक्ति र उल्लासका साथ मनाइएको छ । फागुन कृष्ण चतुर्दशीका दिन मनाइने यस पर्वलाई भगवान् शिवको परम प्रिय दिन मानिन्छ । बिहानैदेखि शिवालयहरूमा घण्टानाद, शंखध्वनि र ‘हर हर महादेव’ को जयघोष गुन्जिएको थियो ।
वीरगंजका प्रमुख शिव मन्दिरहरूमा भक्तजनहरूको उल्लेख्य भीड देखिएको थियो । विशेषगरी अलखिया मठस्थित शिव मन्दिर र चिनिमिल क्षेत्रमा रहेको पशुपति मन्दिरमा बिहानैदेखि जलाभिषेक र पूजा अर्चनाका लागि सर्वसाधारणको घुइँचो लागेको छ । कतिपय श्रद्धालुहरूले निर्जल व्रत बसेका छन् भने धेरैले रातभरि जाग्राम बसेर चार प्रहरको विशेष पूजा गर्ने तयारी गरेका छन् ।
शिवलाई प्रिय मानिने दूध, दही, घिउ, मह, बेलपत्र र धतुरो चढाउँदै भक्तजनहरूले शिवलिंगमा दुग्धाभिषेक तथा रुद्राभिषेक गरेका थिए । मन्दिर परिसरमा भजन कीर्तन, दीप प्रज्वलन र धार्मिक प्रवचनले वातावरण आध्यात्मिक बनेको थियो ।
उता पर्साको ऐतिहासिक तथा चर्चित जिराभवानी मन्दिरमा पनि आइतबारदेखि शिवरात्री मेला प्रारम्भ भएको छ । सात दिनसम्म चल्ने यो मेलामा नेपालका विभिन्न जिल्लासहित भारतबाट समेत दर्शनार्थी आउने परम्परा छ । मेलामा धार्मिक अनुष्ठान, भजन कीर्तन, साधुसन्तको प्रवचन र सांस्कृतिक कार्यक्रम आयोजना गरिएको छ । स्थानीय व्यवसायीहरूका लागि समेत मेला आर्थिक गतिविधिको अवसर बनेको छ ।
यसैबीच, काठमाडौंस्थित पशुपतिनाथ मन्दिर क्षेत्रमा सुरक्षाकर्मीको बाक्लो उपस्थिति देखिएको थियो । महाशिवरात्रीका अवसरमा दर्शनार्थीहरूको अत्यधिक भीडलाई व्यवस्थापन गर्न ठूलो संख्यामा सुरक्षाकर्मी परिचालन गरिएको प्रहरीले जनाएको छ । जिल्ला प्रहरी परिसर काठमाडौंका अनुसार उच्श्रृङ्खल गतिविधि, पाकेटमारी, धकेलाधकेल तथा गाँजा सेवनमा संलग्न १३८ जनालाई नियन्त्रणमा लिइएको छ ।
प्रहरीका अनुसार पर्वको मर्यादा भंग गर्ने, भीडमा अव्यवस्था सिर्जना गर्ने र आपराधिक गतिविधिमा संलग्न हुनेलाई कडाइका साथ नियन्त्रण गरिएको हो । आइतबार बिहानैदेखि पशुपति क्षेत्रमा दर्शनार्थीहरूको लामो लाइन लागेको छ भने साधुसन्तहरूको उपस्थितिले क्षेत्र थप आकर्षक बनेको छ ।
देशका विभिन्न भागमा आइतबार रातभर जाग्राम बस्ने, भजन कीर्तन गर्ने र शिवपुराण पाठ गर्ने कार्यक्रम तय छन् । महाशिवरात्री केवल धार्मिक आस्थाको पर्व मात्र नभई सामाजिक सद्भाव, संयम र आत्मशुद्धिको सन्देश बोकेको दिनका रूपमा मनाइँदै आएको छ । श्रद्धा र अनुशासनबीच मनाइँदै गरेको यस वर्षको महाशिवरात्रिले भक्तजनमा आध्यात्मिक ऊर्जा थप्नुका साथै देशभर शान्ति र समृद्धिको कामना गरेको विश्वास गरिन्छ ।
प्रतिक्रिया दिनुहोस् !