वीरगंज (पर्सा), १ फागुन । पर्सा निर्वाचन क्षेत्र नम्बर–१ अन्तर्गत वीरगंज महानगरपालिका वडा नं. १८ र २१ मा ओमप्रकाश सर्राफको घरदैलो, भेटघाट तथा संवाद कार्यक्रम उत्साहजनक रूपमा सम्पन्न भएको छ । जनमत पार्टीका तर्फबाट प्रतिनिधिसभा सदस्य उम्मेदवार सर्राफले स्थानीय बासिन्दासँग प्रत्यक्ष संवाद गर्दै तराई मधेशका मुख्य मुद्दाहरू, विशेषगरी कृषकहरूको अवस्था र अधिकारका विषयमा आफ्ना धारणा राखेका हुन् ।
घरदैलो अभियानका क्रममा उम्मेदवार सर्राफले तराई मधेशको अर्थतन्त्रको मेरुदण्ड कृषि क्षेत्र भएको उल्लेख गर्दै राज्यको दीर्घकालीन बेवास्ताका कारण किसानहरू निरन्तर मारमा परेको बताए । ‘किसानले पसिना बगाउँछन्, तर मूल्य राज्यले बुझ्दैन,’ उनले भने, ‘उत्पादनको लागत बढ्दो छ, बजार सुनिश्चित छैन, मलबीउको अभाव छ, तर समाधानका लागि ठोस पहल भएको देखिँदैन ।’ उनले किसानप्रति भएको विभेद अन्त्य गर्न र कृषिलाई सम्मानित पेशाका रूपमा स्थापित गर्न जनमत पार्टी सधैं अग्रसर रहने प्रतिबद्धता व्यक्त गरे ।
सरार्फले कृषि क्षेत्रलाई आधुनिकीकरण र व्यावसायीकरण गर्दै आम्दानी बढाउने स्पष्ट योजना आफूहरूसँग मात्र रहेको जिकिर गरे । सिंचाइ, भण्डारण, प्रशोधन र बजार व्यवस्थापनलाई एकीकृत रूपमा अघि बढाएर किसानलाई उत्पादनदेखि बिक्रीसम्म सुरक्षा दिने नीतिगत खाका जनमत पार्टीले तयार पारेको उनको दाबी थियो । ‘जब किसान बलियो हुन्छ, तब मधेश बलियो हुन्छ, र देश समृद्ध हुन्छ,’ उनले जोड दिए ।
कार्यक्रममा बोल्दै सर्राफले देश र मधेशको निकासका लागि दूरदर्शी नेतृत्व आवश्यक रहेको उल्लेख गर्दै डा. सिके राउत को नेतृत्वमा मात्र मधेशका आवाजहरू राष्ट्रिय नीतिमा प्रभावकारी रूपमा स्थापित हुन सक्ने बताए । उनले मतदाताहरूलाई जनमत पार्टीको चुनाव चिन्ह ‘हर्न’ मा मतदान गरी परिवर्तनको यात्रामा साथ दिन अपिल गरे ।
घरदैलो तथा संवाद कार्यक्रममा स्थानीय बासिन्दाहरूको उल्लेख्य सहभागिता देखिएको थियो । सहभागीहरूले कृषि, रोजगारी, शिक्षा, स्वास्थ्य र पूर्वाधार विकासका विषयमा आफ्ना जिज्ञासा र अपेक्षाहरू राखेका थिए । सरार्फले ती सबै विषयमा चरणबद्ध रूपमा काम गर्ने प्रतिबद्धता जनाउँदै जनप्रतिनिधि भएपछि जनताको घरदैलोमै सेवा पुर्याउने आश्वासन दिए ।
उक्त कार्यक्रममा पार्टीका नेतृ रम्भा मिश्रा, समानुपातिक उम्मेदवार बिजय पासवान, श्याम शंकर चौरसिया, अनिता रौनियार, सत्युग साह, तुल्सि राम, सहनवाज राकी, अजित सिंह, मन्जय शर्मा, सुमित सिंह, रामबहादुर पासवान, सन्तोष पासवानलगायतको उपस्थिति रहेको थियो । नेताहरूले पनि आ–आफ्नो मन्तव्य राख्दै जनमत पार्टीले मधेशका वास्तविक मुद्दाहरू उठाउँदै आएको र अब ती मुद्दाहरूलाई कार्यान्वयनमा लैजान जनताको साथ अपरिहार्य रहेको बताए ।
वीरगंजका यी वडाहरूमा सम्पन्न घरदैलो अभियानले जनमत पार्टीप्रति स्थानीय स्तरमा बढ्दो आकर्षण देखिएको सहभागीहरूको भनाइ थियो । कार्यक्रम अवधिभर मतदाताहरूले उम्मेदवारसँग खुलेर संवाद गरेका थिए, जसले चुनावी माहोललाई अझ सजीव बनाएको देखिन्थ्यो । जनमत पार्टीका उम्मेदवार सरार्फले आगामी दिनहरूमा पनि घरदैलो, भेटघाट र संवादलाई निरन्तरता दिँदै प्रत्येक टोल–टोलमा पुगेर जनताको विश्वास जित्ने अभियान जारी राख्ने बताए । उनले भने, ‘यो चुनाव केवल प्रतिनिधि छान्ने प्रक्रिया होइन, मधेशको सम्मान र अधिकार सुनिश्चित गर्ने अवसर हो ।’
प्रतिक्रिया दिनुहोस् !