वीरगंज (पर्सा), २९ माघ । पर्सा निर्वाचन क्षेत्र नं. १ मा जनमत पार्टीका तर्फबाट प्रतिनिधिसभा सदस्य उम्मेदवार ओमप्रकाश सर्राफले वीरगंज महानगरपालिका वडा नं. २३ अन्तर्गत इटियाही र प्रसौनी क्षेत्रमा घरदैलो, भेटघाट तथा संवाद कार्यक्रम सञ्चालन गरेका छन् । चुनावी अभियानलाई सक्रिय बनाउँदै सर्राफले स्थानीय मतदातासँग प्रत्यक्ष कुराकानी गर्दै पार्टीका एजेण्डा र आफ्नो प्रतिबद्धता प्रस्तुत गरेका हुन् ।
भेटघाटका क्रममा सर्राफले संघीयता, समावेशिता र मधेशको स्वाभिमान जोगाउने मुद्दामा जोड दिए । उनले सयौंको बलिदानीबाट प्राप्त उपलब्धिहरूको संरक्षणका लागि जनमत पार्टीलाई समर्थन आवश्यक रहेको धारणा राखे । संघीयता र मधेशविरोधी शक्तिलाई परास्त गर्दै मधेस र मधेसी समुदायको समग्र उत्थानका लागि सहकार्य गर्न उनले आह्वान गरे ।
देश र मधेशको समस्याको समाधानका लागि जनमत पार्टी र डा. सीके राउतसँग स्पष्ट दृष्टिकोण रहेको उल्लेख गर्दै उनले ‘हर्न’ चुनाव चिह्नमा मतदान गर्न मतदातासँग आग्रह गरे । स्थानीयसँगको संवादमा उनले विकास, अधिकार र पहिचानका सवालमा पार्टीको धारणा स्पष्ट पारेका थिए ।
कार्यक्रममा बिध्यालाल प्रसाद, रम्भा मिश्रा, डा. मनोज कुमार, समानुपातिक उम्मेदवार विजय पासवान, भुपेन्द्र साह, सीए देवराज, महादेव शर्मा, निराजन कुशवाहा, सहनवाज राकी, अजित सिंह, मन्जय शर्मा, सुमित सिंह, रामबहादुर पासवान, सन्तोष पासवान लगायतका नेता तथा कार्यकर्ताहरूको सहभागिता रहेको थियो ।
प्रतिक्रिया दिनुहोस् !