वीरगंज (पर्सा), २५ माघ । आगामी फागुन २१ गते सम्पन्न हुन गइरहेको प्रतिनिधिसभा सदस्य निर्वाचनमा पर्सा निर्वाचन क्षेत्र नम्बर–३ राजनीतिक रूपमा अत्यन्तै चासोको केन्द्र बनेको छ । यस क्षेत्रमा मुख्यतः नेपाली कांग्रेस, नेकपा एमाले र नेपाली कम्युनिष्ट पार्टी (नेकपा) बीच कडा प्रतिस्पर्धा हुने संकेत देखिएको छ । क्षेत्रवासीको विश्लेषण अनुसार कांग्रेसका सुरेन्द्र प्रसाद चौधरी, एमालेका रुपेश पाण्डे र नेकपाका छोटेलाल यादवबीच मुख्य चुनावी भिडन्त हुने सम्भावना प्रबल छ ।
अघिल्लो प्रतिनिधि सभा निर्वाचनमा यही क्षेत्रबाट एमालेका राजकुमार गुप्ता विजयी भएका थिए । उनी संघीय मामिला तथा सामान्य प्रशासन मन्त्रीसमेत बनेका थिए । तर, भ्रष्टाचारसम्बन्धी मुद्दाका कारण हाल जेलमा रहेकाले यस पटक एमालेले उनलाई उम्मेदवार नबनाई नयाँ नेतृत्वको खोजी गरेको छ । सोही क्रममा एमालेले रुपेश पाण्डेलाई उम्मेदवारका रूपमा अघि सारेको हो । पाण्डे यद्यपि नयाँ अनुहार भए पनि पार्टी संगठनभित्रको बलियो आधार, कार्यकर्ताको एकता र सक्रिय चुनावी अभियानका कारण उनी प्रभावशाली उम्मेदवारका रूपमा स्थापित हुँदै गएका छन् ।
नेपाली कांग्रेसका तर्फबाट पूर्वमन्त्री सुरेन्द्र प्रसाद चौधरी यस पटक पनि चुनावी मैदानमा छन् । लामो समयदेखि सक्रिय राजनीतिमा रहेका चौधरीको अनुभव, पहिचान र संगठनात्मक पहुँच बलियो मानिन्छ । यद्यपि पछिल्ला वर्षहरूमा मतदाताको सोचमा आएको परिवर्तन र नयाँ विकल्पप्रतिको आकर्षणले उनको चुनावी यात्रामा केही चुनौती थपिएको क्षेत्रवासीको बुझाइ छ । त्यसैगरी राष्ट्रिय स्वतन्त्र पार्टीबाट उम्मेदवार बनेका निर्माण व्यवसायी रामाकान्त चौरसिया विगतमा कांग्रेससँग आबद्ध रहेकाले कांग्रेसको परम्परागत मतमा केही प्रभाव पार्न सक्ने विश्लेषण पनि भइरहेको छ ।
पर्सा–३ मा यस पटक जम्मा २३ जना उम्मेदवार चुनावी प्रतिस्पर्धामा छन् । तीमध्ये १४ जना विभिन्न राजनीतिक दलका उम्मेदवार हुन् भने ९ जना स्वतन्त्र उम्मेदवार रहेका छन् । यस निर्वाचन क्षेत्रबाट जनमत पार्टीले मात्रै महिला उम्मेदवारका रूपमा मालती कुशवाहालाई मैदानमा उतारेको छ । बाँकी सबै २२ जना उम्मेदवार पुरुष रहेका छन्, जसले महिला प्रतिनिधित्वको सवाललाई पनि चुनावी बहसको विषय बनाएको छ ।
एमालेले सुरुआतमा प्रदेशसभा सदस्य तथा पूर्वमन्त्री प्रमोद जयसवाललाई टिकट दिने निर्णय गरेको थियो । तर, जयसवाल चुनावमा सहभागी हुन अनिच्छुक देखिएपछि पार्टीले अन्ततः रुपेश पाण्डेलाई उम्मेदवार बनाएको हो । यस निर्णयपछि एमाले संगठन थप सक्रिय बनेको देखिन्छ ।
यसै क्षेत्रबाट राष्ट्रिय प्रजातन्त्र पार्टीका नवीनकुमार सिंह पनि चुनावी मैदानमा छन् । सिंह सरकारी सेवाबाट राजीनामा दिएर जनताको प्रतिनिधि बन्ने उद्देश्यसहित राजनीतिमा होमिएका हुन् । साथै जसपा नेपालका नागेन्द्र यादव, नेमकिपाका सरोज साह, नेपाल जनता पार्टीका धर्मेन्द्र तिवारी, संयुक्त नागरिक पार्टीका शिवनाथ महतो, जय मातृभूमि पार्टीका राजकुमार यादव, उज्यालो नेपाल पार्टीका रामरूपप्रसाद साह, राष्ट्रिय मुक्ति पार्टीका मनोज पण्डित कुम्हाल र आम जनता पार्टीका महमद इस्तखार पनि मतदातासामु आफ्ना एजेन्डा लिएर उपस्थित छन् ।
बहुदलीय प्रतिस्पर्धा, नयाँ–पुराना उम्मेदवारको मिश्रण र मतदातामा बढ्दो राजनीतिक चेतनाका कारण पर्सा–३ को निर्वाचन लोकतान्त्रिक अभ्यासको महत्वपूर्ण उदाहरण बन्ने अपेक्षा गरिएको छ । मतदाताले विवेकपूर्ण निर्णय गर्दै सक्रिय सहभागिता जनाएमा यस निर्वाचनले समृद्ध र उत्तरदायी प्रतिनिधित्वको बाटो खोल्ने विश्वास लिइएको छ ।
प्रतिक्रिया दिनुहोस् !