पटेर्वासुगौलीमा रूपेश पाण्डेको पक्षमा जनलहर, पर्सा क्षेत्र-३ मा परिवर्तनको संकेत

वीरगंज (पर्सा), २४ माघ । पर्सा जिल्ला निर्वाचन क्षेत्र नं.–३ अन्तर्गत पर्ने पटेर्वा सुगौली गाउँपालिकामा नेकपा एमालेबाट प्रतिनिधिसभा सदस्य पदका युवा उम्मेदवार रूपेश कुमार पाण्डेको पक्षमा जनसमर्थन तीव्र रूपमा बढ्दै गएको छ । फागुन २१ गते हुने प्रतिनिधिसभा निर्वाचन नजिकिँदै जाँदा आयोजित अगुवा कार्यकर्ता भेटघाट कार्यक्रममा देखिएको स्थानीयको उत्साहपूर्ण सहभागिताले पर्सा–३ मा राजनीतिक परिवर्तनको बलियो संकेत दिएको छ ।

कार्यक्रमलाई सम्बोधन गर्दै नेकपा एमालेका केन्द्रीय कमिटी उपमहासचिव तथा पूर्व मन्त्री योगेश भट्टराईले पर्सा–३ मा परिवर्तन निश्चित रहेको दाबी गरे । विकास, सुशासन र रोजगारी सिर्जनालाई केन्द्रमा राखेर एमाले स्पष्ट योजनासहित अघि बढिरहेको उल्लेख गर्दै उनले मधेशको समग्र विकासका लागि एमाले नेतृत्व अनिवार्य रहेको बताए । ‘पर्सा–३ बाट सक्षम र ऊर्जावान उम्मेदवार रूपेश कुमार पाण्डेको विजय सुनिश्चित छ,’ भट्टराईले विश्वास व्यक्त गरे ।

भेटघाट कार्यक्रममा उम्मेदवार पाण्डेले क्षेत्रको आर्थिक, सामाजिक तथा भौतिक विकासलाई प्राथमिकतामा राख्दै आफ्नो स्पष्ट विकास दृष्टिकोण प्रस्तुत गरे। पर्सा–३ लाई समृद्ध, आत्मनिर्भर र अवसरले भरिपूर्ण क्षेत्र बनाउने प्रतिबद्धता व्यक्त गर्दै उनले शिक्षा, स्वास्थ्य, कृषि, उद्योग तथा युवाको रोजगारीलाई विशेष प्राथमिकता दिने बताए । ‘अब नाराको होइन, कामको राजनीति आवश्यक छ,’ भन्दै उनले जनताको विश्वासलाई विकासमा रूपान्तरण गर्ने संकल्प व्यक्त गरे ।

नेकपा एमाले पटेर्वा सुगौली गाउँपालिका कमिटी अध्यक्ष पुरण यादवको अध्यक्षता तथा योगेश भट्टराईको प्रमुख आतिथ्यमा सम्पन्न कार्यक्रममा केन्द्रीय कमिटी सदस्य तथा पर्सा जिल्ला इन्चार्ज प्रभु हजरा, केन्द्रीय सदस्य विजय सरावगी, केन्द्रीय सल्लाहकार परिषद सदस्य अरबिन्द सिंह, मधेश प्रदेश कमिटी उपाध्यक्ष बिचारी यादव, प्रदेश कमिटी सदस्यहरू, पर्सा जिल्ला अध्यक्ष विश्वम्भर शर्मा, सचिव महेश दाश, नेता शिव पटेल, प्रमोद जयसवाल, महिला नेतृ मन्तुरा चौधरी, फुलमति चौधरी लगायत स्थानीय नेता तथा कार्यकर्ताहरूको उल्लेखनीय उपस्थिति रहेको थियो ।

कार्यक्रमका वक्ताहरूले राष्ट्रियता, स्थिरता र समृद्धिको यात्रामा नेकपा एमालेको नेतृत्व आवश्यक रहेको धारणा राख्दै पर्सा–३ बाट योग्य, ऊर्जाशील र विकासमुखी उम्मेदवारका रूपमा रूपेश कुमार पाण्डेलाई विजयी गराउन सबैलाई आह्वान गरे । पटेर्वा सुगौलीमा देखिएको जनउत्साह र सहभागिताले पर्सा–३ मा राजनीतिक रूपान्तरणको स्पष्ट संकेत दिएको छ । विकास र समृद्धिको एजेन्डासहित चुनावी मैदानमा उत्रिएका युवा उम्मेदवार रूपेश कुमार पाण्डेप्रति जनविश्वास दिनप्रतिदिन मजबुत बन्दै गएको देखिएको छ ।