वीरगंज (पर्सा), १८ पुस । पछिल्लो समय विशेषगरी तराई मधेश क्षेत्रमा सडक दुर्घटनाको संख्या तीव्र रूपमा बढ्दै गएको छ । नेपालभर सवारी दुर्घटनामा मृत्यु हुनेहरूमध्ये करिब २१ प्रतिशत मधेश प्रदेशका रहेको तथ्यांकले स्थिति कति भयावह छ भन्ने स्पष्ट देखाउँछ । यति गम्भीर अवस्था हुँदाहुँदै पनि दुर्घटना न्यूनिकरणका लागि गरिएका प्रयासहरू अपेक्षाकृत प्रभावकारी हुन नसकेको स्थानीयवासीको गुनासो छ ।
नेपालमा हरेक वर्ष सडक दुर्घटनाका कारण थुप्रै मानिसले ज्यान गुमाउने गरेका छन् भने दर्जनौँ नागरिक घाइते हुने गरेका छन् । गुणस्तरीय सडकको अभाव, सडक निर्माणका क्रममा हुने भ्रष्टाचार, यातायात नियमको उल्लङ्घन, तीव्र गति तथा लागूपदार्थ सेवन गरी सवारी चलाउने प्रवृत्ति सडक दुर्घटना बढ्नुका मुख्य कारण भएको नागरिकहरू बताउँछन् ।
चालु आर्थिक वर्षको मंसिर महिनासम्मको तथ्यांकअनुसार, देशभर १३ हजार ८८० वटा सवारी दुर्घटना हुँदा १ हजार ४२ जनाको मृत्यु भइसकेको छ । ती मृतकमध्ये मधेश प्रदेशमा मात्रै २२० जनाले ज्यान गुमाएका छन् ।
त्यसैगरी, मधेश प्रदेशमा आर्थिक वर्ष ०८१/०८२ को साउनदेखि मंसिरसम्म मात्र २ हजार ६७१ दुर्घटना हुँदा १९१ जनाको मृत्यु भएको छ भने ४ हजार ५७६ जना घाइते भएका छन् । चालु आर्थिक वर्षको मंसिरसम्म आइपुग्दा मधेश प्रदेशमै ३ हजार ४८४ दुर्घटनामा २२० जनाको मृत्यु र ५ हजार ६८५ जना घाइते भएको तथ्यांक रहेको छ ।
तथ्यांकअनुसार, चालु आर्थिक वर्षमा नेपालभर सवारी दुर्घटनामा मृत्यु हुनेमध्ये १७ देखि ३० वर्ष उमेर समूहका युवाहरू सबैभन्दा बढी प्रभावित भएका छन् । मधेश प्रदेशका ८ जिल्लामा यही उमेर समूहका युवाहरूको संख्या उल्लेखनीय रहेको प्रहरीको भनाइ छ ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, पथलैयाद्वारा महोत्तरीको बर्दिबासमा आयोजित एक कार्यक्रममा सडक दुर्घटनामा युवाहरू बढी पर्ने गरेको जनाएको छ । प्रहरीका अनुसार, युवामा पर्याप्त सचेतना ल्याउन सके दुर्घटनाको दर उल्लेख्य रूपमा घटाउन सकिने विश्वास स्थानीयको छ ।
स्थानीयवासीहरूका अनुसार, तीव्र गति, सडकको दुरावस्था र लागूपदार्थ सेवन गरी सवारी चलाउने प्रवृत्ति दुर्घटनाका प्रमुख कारण हुन् । यी गुनासोलाई गम्भीर रूपमा लिइएको मधेश प्रदेश प्रहरी कार्यालय, जनकपुरधामका प्रमुख गोविन्द थपलियाले बताएका छन् ।
उनले मधेश प्रदेशका अन्य जिल्लाहरूको अवस्थाबारे जानकारी दिँदै महोत्तरी जिल्लामा मात्रै पछिल्लो ६ महिनामा अघिल्लो वर्षको तुलनामा सडक दुर्घटना बढेको बताए । प्रदेशस्तरीय तथ्यांकअनुसार, १६ वर्षदेखि ४० वर्ष उमेर समूहका व्यक्तिहरू सडक दुर्घटनामा बढी घाइते हुने र ज्यान गुमाउने गरेको देखिएको छ ।
सडक दुर्घटना न्यूनीकरणका लागि स्थानीयले नियमित सवारी चेकजाँच, मापसे (मादक पदार्थ सेवन) चेकजाँच, विद्यालय तथा क्याम्पसहरूमा सडक सुरक्षा सम्बन्धी सचेतना कक्षा, विभिन्न स्थानमा स्टिकर, पर्चा र पम्पलेट टाँस्ने, तथा सवारी चालकहरूलाई लक्षित सचेतनामूलक कार्यक्रमहरू बढाउनुपर्ने सुझाव दिएका छन् ।
सडक सुरक्षामा राज्यका निकाय, स्थानीय तह, प्रहरी प्रशासन र नागरिक सबैको साझा प्रयास बिना दुर्घटनाको भयावह अवस्था रोक्न कठिन हुने देखिएको छ । 
प्रतिक्रिया दिनुहोस् !