वीरगंज (पर्सा), १७ मंसिर । पर्साको जगरनाथपुर गाउँपालिकाले स्थानीय किसानलाई आधुनिक र व्यावसायिक खेतीतर्फ प्रोत्साहित गर्ने उद्देश्यसहित ५० प्रतिशत अनुदानमा उन्नत जातका गहुँ बीउ वितरण गरेको छ । आधुनिक कृषि प्रविधि विस्तार र उत्पादन वृद्धि गर्ने दीर्घ लक्ष्यसहित सञ्चालन गरिएको कार्यक्रमलाई किसानबाट उत्साहजनक प्रतिक्रिया मिलेको छ ।
गाउँपालिकाका अनुसार, अनुदानमार्फत वितरण गरिएको बीउले किसानको उत्पादन लागत घटाउने, उपज वृद्धि गर्ने तथा खेतीलाई परिणाममुखी र व्यवसायिक बनाउने लक्ष्य लिएको छ । गुणस्तरीय बीउ समयमै उपलब्ध गराउन सके कृषि क्षेत्र स्वतः सबल र समृद्ध बन्ने विश्वास स्थानीय सरोकारवालाहरूले व्यक्त गरेका छन् ।
किसानलाई उन्नत बीउ, आवश्यक तालिम तथा प्रविधिक सहयोग मार्फत आधुनिक खेतीमा ल्याउन राज्यको भूमिका महत्वपूर्ण हुने बताउँदै गाउँपालिकाका अध्यक्ष श्रीकान्त प्रसाद यादवले कार्यक्रममा किसानहरुप्रति आभार व्यक्त गरे । उनले भने, ‘किसान दाजुभाइ तथा दिदीबहिनीहरूलाई सशक्त बनाउनु हाम्रो प्राथमिकता हो । हामी सहजीकरण, प्रविधिक सहयोग र कृषि अनुदानमार्फत किसानको आय वृद्धि तथा आत्मनिर्भरता अभिवृद्धिको दिशामा अघि बढिरहेका छौँ ।’
गाउँपालिकाले आगामी दिनमा अन्य बाली र कृषि योजनामा पनि यस्तै सहुलियतपूर्ण कार्यक्रम विस्तार गर्दै समृद्ध कृषि र समृद्ध गाउँ निर्माणमा योगदान पुर्याउने तयारी गरिरहेको जनाइएको छ । 
प्रतिक्रिया दिनुहोस् !