• मुस्कान श्रेष्ठ
वीरगंज (पर्सा), २१ भदौ । राष्ट्रिय स्वतन्त्र पार्टीका उपाध्यक्ष स्वर्णीम वाग्लेले आफूहरु प्रदेश खारेजको पक्षमा नरहेको बताएका छन् । शुक्रबार वीरगंजमा आयोजित आर्थिक मन्दी र अर्थ–राजनीतिक निकास विषयक अन्तरक्रिया कार्यक्रमलाई सम्बोधन गर्दै उपाध्यक्ष बाग्लेले सो कुरा बताएका हुन् ।
पटकपटक मुख्यमन्त्री परिवर्तनले ठूला पार्टीहरुले आफ्ना कार्यकर्तालाई व्यवस्थापन गर्ने कार्य गरिरहेको देखिएको हुँदा आफूहरु संघीयता खारेज नभई संरचना परिवर्तन गर्ने पक्षमा रहेको स्पष्ट पार्दै उपाध्यक्ष बाग्लेले मुलुकमा प्रत्यक्ष निर्वाचित प्रदेश सरकार बनाउन आवश्यक रहेको बताए । सहकारी ठगी प्रकरणमा रास्वपाका अध्यक्षको संलग्नता विषयमा उठेको प्रश्नमा जवाफ दिदै उपाध्यक्ष बाग्लेले संसदीय विषेश छानबिन समितिले अनुसन्धान गरिरहेको बताए । उनले सहकारी ठगी प्रकरणबारे रास्वपा आफै पनि समस्याको समाधानतर्फ लागेको बताए ।
नेपला उद्योग वाणिज्य महासंघका केन्द्रिय सदस्य सुबोध गुप्ताले उद्योगहरु ४० प्रतिशत मात्र संचालनमा रहेको बताए । उनले साना साना गल्तीका कारण व्यापारीहरुलाई जेल जाने स्थितिले त्रसित बनाएको बताए । वीरगंज उद्योग वाणिज्य संघका अध्यक्ष अनिल अग्रवालले निजी क्षेत्रले लोकतन्त्रको अनुभुति गर्न नसकेको बताए । उनले राज्यले करको दर बढाउँदा नेपाल–भारत खुल्ला सिमाबाट अवैद्य करोवार गर्ने क्रम बढ्दै उनको भनाई छ ।
आर्थिक नगरी वीरगंजबाट मात्रै ५० प्रतिशत भन्दा बढि कर संकलन हुने गरेपनि राज्यले वीरगंजलाई उपेक्षा गर्दै जहिलेपनि न्यून बजेट छुट्टयाउने गरेको अध्यक्ष अग्रवालको भनाई छ । विश्व डिजिटलाइजेशन तर्फ उन्मुख भइरहेको अवस्थामा वीरगंज भन्सार कार्यालयमा अहिले पनि पुरानो मूल्याँकन पुस्तिकको आधारमा जाचँपास हुने गरेकोले त्यसतर्फ सरकारको ध्यानाकर्षण हुनेपर्ने बताए ।
कार्यक्रममा उद्योगीहरु व्यवसायीहरुले मुलुकको खस्कदो आर्थिक स्थिति, राज्यले निजी क्षेत्रलाई गरेको व्यवहार, युवाहरुको विदेश पलायनमा वृद्धि लगायत समसमायिक विषयमा चर्चा गरेका थिए । राष्ट्रिय स्वतन्त्र पार्टी पर्साका सभापति हरि पन्तको अध्यक्षतामा आयोजित कार्यक्रममा वीरगंजका उद्योगीहरु, मधेश विश्व विधालयका उप–कुलपति डा. दिपक शाक्य, विभिन्न कलेजका प्राध्यापकहरु लगायत पत्रकारहरुको उपस्थिति रहेको थियो ।
प्रतिक्रिया दिनुहोस् !