वीरगंज (पर्सा), २५ साउन । वीरगंजको बसपार्क स्थित खटेका ट्राफिक प्रहरी रन्जित झाले ड्युटी भन्दा पनि असुली धन्दामा तल्लिन देखिएका छन् । बसपार्क स्थित अनावश्यक सवारी पार्किङ्ग, सवारी जाम लगायतका समस्यालाई समाधान नगरी कुन गाडीबाट पैसा असुल्न सकिन्छ भन्नेतर्फ तल्लिन देखिएका हुन् ।
झाले बसपार्क स्थित चेकजाँचको नाममा भारतीय नम्बरको सवारीबाट खुलेयाम १ हजारदेखि १५ सय रुपैयाँसम्म असुली गर्ने गरेका छन् । बुधबार राति करिब ९ बजेको समयमा झाले ऐन नियमलाई धज्जी उडाउँदै खुलेयाम असुली रहेका छन् । वीरगंज बजारमा दिनहुँ हजारौं भारतीय नम्बरको मोटरसाइकलहरु आउने गरेको अवस्थामा इन्ट्री, भन्सार नरहेका सवारी चालकसँग १ हजारदेखि १५ सय रुपैयाँसम्म असुल्ने गरेका छन् ।
बुधबार राति करिब ९ बजेको समयमा बसपार्क स्थित चेकजाँचको क्रममा भर्खरी शो-रुमबाट निकालिएको भारतीय नम्बरको एम.टि. ५० गाडीलाई ट्राफिक प्रहरीले झाले रोके । मोटरसाइक भारतीय भएपनि सवारी चालक भने नेपाली सरकारी कर्मचारी थिए । रक्सौल स्थित आफन्तले भर्खरै नयाँ गाडी किनेको कारण उनीसँग कागजात पनि थिएन्, मात्रै कम्पनीको विक्रीनामा कागजात थियो । इन्ट्री, भन्सार केही नरहेको अवस्थामा ट्राफिक प्रहरी झाले मोटरसाइकललाई आफ्नो नियन्त्रणमा लिए ।
मोटरसाइकल छाड्न भन्दा ठूलो ठूलो ऐन, कानूनको कुरा गर्दै बिना इन्ट्री भन्सारको नम्बर प्लेट बिनाको भारतीय नम्बरको मोटरसाइकल छाड्नै नमिल्ने भन्दै जिल्लामा बुझाईदिने कुरा गर्दै थिए । तर एक घण्टा पश्चात मोटरसाइकल चालकले रु १ हजार रुपैयाँ दिँदा सबै ऐन, नियम कानूनलाई लत्याउँदै मोटरसाइकल छाडे । जब नियमले छाड्नै नमिल्ने हो भने झाले किन छाडे ? यस कार्यमा उनको मात्रै हात छैन, बसपार्क स्थित ट्राफिक प्रहरी इन्चार्ज प्रहरी सहायक निरीक्षक बीर बहादुर यादवको पनि संलग्नता छ ।
दुबैजना मिलेर चेकजाँचको नाममा भारतीय नम्बरको सवारी चालकसँग खुलेयाम अवैध रकम असुली रहेका छन् । दिनभरि हजारौं गाडी ओहर दोहर गर्दा कहिँ कतै देखा नपर्ने बसपार्क स्थित ट्राफिक प्रहरी साँझ ६ बजेपछि मात्रै आफ्नो ड्युटीमा निस्कन्छन्, त्यो पनि चेकजाँच गर्न मात्रै । चेकजाँचको नाममा जता पायो उतै रोक्नुस्को बोर्ड लगाएर चेकजाँच शुरु गर्छन् र त्यहीबाट शुरु हुन्छ अवैध असुली कार्य ।
यसबारे जिल्ला ट्राफिक प्रहरी कार्यालय पर्साका प्रमुख प्रहरी निरीक्षक भास्कर खतिवडा आफू अनभिज्ञ छन् जस्तो लाग्दैन । बसपार्क स्थित ट्राफिक मात्रै नभई ड्राइपोर्ट चोक स्थित खटेका ट्राफिक प्रहरी, पावरहाउस चोक स्थित खटेका ट्राफिक प्रहरी, रजतजयन्ती चोक स्थित खटेका ट्राफिक प्रहरी आफ्नो काम कर्तव्य भन्दा पनि अवैध असुलीतर्फ बढि केन्द्रित रहने गरेका छन् । शंकराचार्य गेट स्थित खट्ने ट्राफिक प्रहरी पनि नेपाल भारत ओहरदोहर गर्ने सवारी चालकहरुसँग अवैध रकम असुली गर्ने गरेका छन् ।
समग्रमा भन्नुपर्दा वीरगंजमा ट्राफिक व्यवस्थापनको लागि खटिएका ट्राफिक प्रहरी अवैध रकम असलीको लागि खटाइएको छ भनेर बुझ्दा पनि हुन्छ । राजस्व बढि संकलन गरेको भनेर नौटंकी गर्ने ट्राफिक प्रहरी राजस्व असुलीको आडमा आफ्नो ढुकुटी बढि रहेका छन् । केही दिन यतादेखि घण्टाघर, माइस्थान, आदर्शनगर, अलखियामठ चोकमा खट्ने ट्राफिक प्रहरी मात्रै इमान्दारितापूर्वक आफ्नो भूमिका निर्वाह गरि रहेको देखिन्छन्, नत्र बाँकी त रकम असुलीकै लागि खटाइएका छन् भन्दा पनि फरक पर्दैन् ।
प्रतिक्रिया दिनुहोस् !