वीरगंज (पर्सा), १६ जेठ । वीरगंजमा दुई वटा निजी अस्पताल मापदण्ड विपरित संचालनमा रहेको पाइएको छ । महानगरपालिका भित्र संचालनमा रहेका अस्पतालहरुमध्ये प्रभु हस्पिटल र निलकण्ठ अस्पताल मापदण्ड विपरित संचालनमा रहेको महानगरपालिकाको स्वास्थ्य समितिले जनाएको छ । वीरगंज महानगरपालिका वडा नं. ८ पानीटंकी स्थित प्रभु हस्पिटलले मधेश प्रदेश सरकारबाट २५ शैय्याको इजाजत लिएको भएपनि ६३ शैय्या राखेर अस्पताल संचालन गरिरहेको स्वास्थ्य समितिले अनुगमनको क्रममा पाएको हो ।
समितिका संयोजक उमाशंकर तिवारीले २५ शैय्याको अनुमति पाएको प्रभु अस्पताल ६३ शैय्यामा संचालन भएको बताए । अनुगमनकै क्रममा प्रभु अस्पतालको आइसियू कक्ष र प्रयोगशालामा म्याद गुज्रिएका ८ प्रकारका औषधीहरु भेटिएको जसमा केही औषधीको ४ वर्षअघि नै म्याद गुज्रिसकेको संयोजक तिवारीको भनाई छ । प्रभु अस्तालले भुइँ तल्लामुनि बनाएको अण्डर ग्राउण्ड पार्किङमा ल्याब संचालन गरेको पाइएको महानगरका स्वास्थ्य महाशाखा प्रमुख अनिल यादवले बताए । पार्किङका लागि निर्माण गरिएको ठाउँमा ल्याब संचालन गर्नु कानुन विपरित रहेको उनको भनाई छ ।
त्यसैगरि वीरगंज महानगरपालिका वडा नं. १३ पावरहाउस चोकस्थित संचालित निलकण्ठ हस्पिटल एण्ड रिसर्च सेन्टरले १५ शैय्याको अनुमति लिएर ३३ शैय्या राखेर संचालन भइरहेको पाइएको छ । उक्त अस्पतालमा समेत म्याद गुज्रिएका औषधी बरामद भएको स्वास्थ्य महाशाखा प्रमुख यादवले बताए । दुबै अस्पतालले औषधीजन्य फोहर नछुट्याई एउटैमा मिसाएर राखेको अनुगमन समितिले फेला पारेको थियो ।
वीरगंजका मेयर राजेशमान सिंहले स्वास्थ्यमाथि खेलवाड गर्ने अस्पताललाई महानगरपालिकाले कारवाही गर्ने बताए । बरामद गरिएका म्याद गुज्रेका औषधीहरु थप अनुसन्धान तथा कारवाहीका लागि औषधी व्यवस्था विभाग पठाइएको उनको भनाई छ । निलकण्ठ अस्पताललाई महानगरपालिकाले नै कारवाही गर्ने भन्दै मेयर सिंहले प्रभु अस्पताललाई कारवाही गर्नका लागि प्रदेश सरकारलाई पत्राचार गर्ने बताए ।
प्रभु अस्पतालले २५ शैय्या भन्दा माथि इजाजत लिएको हुनाले प्रदेश सरकारले कारवाही गर्ने भएकोले उक्त अस्पताललाई कारवाही गर्न प्रदेश सरकारलाई महानगरले पत्राचार गर्ने बताए । त्यसको साथै वीरगंजवासीको स्वास्थ्यसँग खेलवाड गरेको यि अस्पतालहरुलाई छुट्टै कारवाही गर्ने उनको भनाई छ । 
प्रतिक्रिया दिनुहोस् !