वीरगंज (पर्सा), ९ वैशाख । पर्सा प्रहरीले २२ लाख भन्दा बढि हुण्डीको रकम सहित दुईजनालाई पक्राउ गरेको छ । पक्राउ पर्नेमा जिल्ला बारा कलैया उपमहानगरपालिका वडा नं. २३ बस्ने ३८ वर्षीय अर्जुन राउत कुर्मी एवं जिल्ला पर्सा विन्दवासिनी गाउँपालिका वडा नं. ३ बस्ने ४३ वर्षीय अजय कुमार साह रहेका छन् । विशेष सूचनाको आधारमा जिल्ला प्रहरी कार्यालय पर्साबाट खटेको प्रहरी टोलीले वीरगंज महानगरपालिका वडा नं. ६ रुङ्गटा कम्प्लेक्स मार्केटभित्र रहेको जगदम्बा मनि ट्रान्सफरबाट दुबैजनालाई पक्राउ गरेको पर्साका प्रहरी नायब उपरीक्षक एवं सूचना अधिकारी कुमार विक्रम थापाले जानकारी दिए ।
उनका अनुसार बाराको कलैया निवासी अर्जुन राउत कुर्मीले पिठ्युमा बोकेको कालो रंगको झोला शंकास्पद देखिएपछि कानूनी रित पुर्याई खानतलासी गर्दा उक्त झोलाभित्र लुकाई छिपाई राखिएको श्रोत नखुलेको रु १ हजारको दरको १ हजार ९ सय ५५ थान र रु ५ सय दरको नोट ५ सय थान एवं रु १ सय दरको नोट ७ गरि २२ लाख ५ हजार ७ सय रुपैयाँ प्रहरीले बरामद गरेको हो । मनि ट्रान्सफरमा नै श्रोत नखुलेको ठूलो रकम बरामद भएपछि प्रहरीले संचालक अजय कुमार साहलाई समेत पक्राउ गरि जिल्ला प्रहरी कार्यालय पर्सामा ल्याई बैंक तथा वित्तीय संस्था सम्बन्धी ऐन, २०७३ विरुद्धको कसुरमा थप अनुसन्धान भइरहेको डिएसपी थापाले जानकारी दिए ।
प्रतिक्रिया दिनुहोस् !