नेशनल मेडिकल कलेजका एमडी शाहनवाज र ल्याब प्रमुख साहलाई थुनामा राख्न ५ दिनको म्याद थप

• हरिशंकर शर्मा
वीरगंज (पर्सा), २८ चैत । नेशनल मेडिकल कलेजका प्रबन्ध निर्देशक शाहनवाज अन्सारी र ल्याब प्रमुख सञ्जय साहलाई थप ५ दिन थुनामा राख्न अदालतले अनुमति दिइएको छ । म्याद गुज्रिएको केमिकल र औषधी प्रयोग प्रकरणमा पक्राउ परेका डा. जैनुद्दिन अन्सारीका सुपुत्र नेशनल मेडिकल कलेजका प्रबन्ध निर्देशक शाहनवाज अन्सारी र ल्याब प्रमुख साहलाई जिल्ला अदालत पर्साले थप ५ दिन थुनामा राख्न अनुमति दिएको हो ।

नेशनल मेडिकल कलेजबाट सोमबार पक्राउ परेका दुबै जनामाथि अनुसन्धान गर्न जिल्ला अदालत पर्साले २ दिनको म्याद थप गरेको थियो भने अनुसन्धान पुरा नभएपछि जिल्ला प्रहरी कार्यालयले माग गरेको ५ दिनको म्यादलाई स्वीकृत गर्दै जिल्ला अदालत पर्साले पुनः दोश्रो पटक ५ दिनको म्याद थप गरेको हो । अदालतले अन्सारीलाई थुनामा राख्न दुई पटक म्याद थप गरेपनि अन्सारी अस्वस्थ्यको नाटक गरि गण्डक स्थित वीरगंज हेल्थ केयर अस्पतालको वातानुकलित कक्षमा रमाई रहेका छन् ।

भनिन्छ पैसा भए जेपनि सम्भव छ, यसैलाई चरितार्थ गरेको छ यो घटनाले । सर्वसाधारण पक्राउ पर्ने वित्तिकै प्रहरीको हिरासतमा बस्नुपर्ने तर एउटा भिआईपि मान्छे जस्तोसुकै गल्ती, अपराध गरेपनि विभिन्न नाटक नौटंकी गरि प्रहरीको हिरासतभन्दा बाहिर बस्ने चलन नै बढेको छ । यस घटनामा प्रहरी र जिल्ला अदालत चनाखो देखिएपनि स्वास्थ्यकर्मीको मिलोमतोको कारण अन्सारी प्रहरी हिरासतबाट उम्किन सफल भएका छन् ।

उनीमाथि मुद्दा चलाएर म्याद माथि म्याद थप गरिएपनि विरामीको नाटक गरि स्वास्थ्यकर्मीको सिफारिसमा अस्पतालको वातानुकिलत कक्षमा रमाई रहेका छन् । यस्ता व्यक्तिहरुलाई प्रसय दिए भोलिका दिनमा उनको गलत क्रियाकलापले झन प्रसय पाउनेछ । चिकित्सा क्षेत्र जस्तो सम्वेदनशील क्षेत्रमा पनि खुलेयाम व्यापारीकरण गरि सर्वसाधारणको ज्यानसँग खेलवाड गर्ने यस्ता अस्पतालमाथि कडा भन्दा कडा कारवाही हुनुपर्नेमा त्यस्ता व्यक्तिलाई पैसाको आडमा बचाउनको लागि नेशनल मेडिकल कलेज प्रशासनदेखि नारायणी अस्पतालका चिकित्सक पनि सक्रिय रहेको पाइएको छ ।

नागरिकको स्वास्थ्यसँग खेलवाड गर्ने कसैको अधिकार छैन । भगवानको दोश्रो दर्जा दिइएको चिकित्सा क्षेत्रलाई यस्ता कुपात्र व्यक्तिहरुले बद्नाम गराई रहेका छन् । जसबाट आम नागरिकको वीरगंजको स्वास्थ्यकर्मीबाट विश्वास गुम्दै गएको छ । कानूनले अपराध गर्ने जोसुकैलाई सामान सजाय दिने व्यवस्था गरेको छ तर पैसाको बलमा यस्ता व्यक्तिहरुले कानूनको धज्जी उडाउँदै खुलेयाम अपराध गरि उम्किन सफल हुँदै आएका छन् ।

अहिलेपनि त्यही अवस्था देखिएको छ नेशनल मेडिकल कलेजको घटनामा । प्रमाणसहित पक्राउ परेका व्यक्तिलाई कानूनको सजायबाट उन्मुक्ति दिलाउन विभिन्न निकाय सक्रिय रहेको पाइएको छ । यस घटनामा सर्वसाधारण व्यक्ति पक्राउ परेको भए उ अहिले प्रहरीको हिरासतमा हुन्थ्यो तर पैसाको बलमा आफ्नो छुट्टै साम्राज्य खडा गरेका डा. जैनुद्दिनको छोरा एवं नेशनल मेडिकल कलेजको प्रबन्ध निर्देशक भएकै कारण प्रहरीको हिरासतसम्म पुग्न सकेका छैनन् ।

उपभोक्ता हित संरक्षण मञ्चले दिएको जाहेरीको आधारमा प्रहरीले उनीहरुविरुद्ध कालोबजारी तथा सामाजिक अपराध मुद्दामा म्याद थप गरेको हो । उपभोक्ता हित संरक्षण मञ्चका सुनिल श्रेष्ठले दिएको जाहेरीको आधारमा प्रहरीले छापामारीको साथै कानूनी कारवाही प्रक्रिया अगाडि बढाएको हो । श्रेष्ठले नेशनल मेडिकल कलेजका प्रबन्ध निर्देशकले उपभोक्तालाई कालोबजारी गरेको भन्दै उनीसहित ल्याब प्राविधिक संजय साहविरुद्ध जाहेरी दिएका थिए ।