वीरगंज (पर्सा), २५ फागुन । पर्सा प्रहरीले वीरगंज स्थित एक सम्सानघाटबाट गाडिएको बालकको शव निकालेको छ । वीरगंज राधेमाई नजिकको सिर्सिया नदि छेउको सम्सानघाटमा गाडिएको १२ वर्षीय बालकको शव बिहीबार राति निकालेर प्रहरीले पोष्टमार्टमका लागि नारायणी अस्पतालमा पठाएको छ ।
वीरगंज महानगरपालिका वडा नम्बर १२ मुर्ली निवासी शम्भु महतो धानुकका १२ बर्षीय छोरा दिलिप मण्डल धानुकको शव उनकै अभिभावकले कसैलाई थाह नदिई बिहीबार बेलुकी सम्सानघाटमा गाडेको प्रहरीले सूचना पाएपछि जिल्ला प्रहरी कार्यालय पर्सा र वडा प्रहरी कार्यालय श्रीपुरबाट खटिएको टोली सोही दिन बेलुकी शम्सानघाटमा पुगेर गाडिएको शवलाई निकालेको हो ।
प्रहरीले प्राप्त सूचनाको आधारमा सम्सानघाट पुग्दा दिलिपको शव अन्दाजी दुई फिट गहिरो खाल्डो खनेर बालुवाले पुरेको अवस्थामा फेला परेको जिल्ला प्रहरी कार्यालय पर्साका प्रहरी नायब उपरीक्षक कुमार विक्रम थापाले जानकारी दिए । उनको अनुसार बालकको मृत्युको खबर अभिभावकले गोप्य राखेर पोष्टमार्टमपनि नगरी सम्सानघाटमा लगेर गाडेकोले घटना शंकास्पद देखिएको हो । मृतक बालक दिलिपका बुबा शम्भु र आमा सबितालाई सोधपुछका लागि बिहीबार राति नै प्रहरीले नियन्त्रणमा लिइएको डिएसपी थापाले बताए ।
छिमेकीका अनुसार दिलिपलाई उनका आमा-बुबाले बिहीबार घरकै एक कोठामा थुनेर ज्यालामजदुरीका लागि घरबाट निस्किएका थिए । कामबाट बिहीबार साँझ घर फर्किदाँ दिलिप कोठामै मृत अवस्थामा भेटिएपछि डरले कसैलाई थाहा नदिई अटोरिक्सामा शव राखेर सम्सानघाटमा लगेर गाडेको बताए । यता बुबा शम्भुले पनि छोरालाई घरमै थुनेर मजदुरीको लागि गएको र फर्कदा छोरा मृत अवस्थामा फेला परेको स्वीकारेको प्रहरी नायब उपरीक्षक थापाले बताए ।
बालक दिलिप लागूपदार्थको कूलतमा फसेको र अरुको घरघरमै पसेर मोबाइल लगायतका सामान चोरेर हैरान पार्नथालेपछि आँफुहरु कामका लागि बाहिर जाँदा दिलिपलाई कोठामा थुनेर जाने गरेको शम्भुले प्रहरीलाई बताएको डिएसपी थापाले जानकारी दिए । तर प्रहरीलाई खबर नै नदिई शव सम्सानघाटमा लगेर गाडेकोले घटना शंकास्पद देखिएको उनको भनाई छ । मृत्यु शंकास्पद देखिएकोले शम्सानघाटबाट शव निकालेर पोष्टमार्टमका लागि अस्पतालमा पठाएको पर्सा प्रहरीको भनाई छ ।
शवको पोष्टमार्टम रिपोर्ट आएपछि मात्र बालकको मृत्युको कारण खुल्ने र त्यसको आधारमा कानुनी कारवाही अगाडि बढाइने डिएसपी थापाले बताए ।
प्रतिक्रिया दिनुहोस् !