कलैया (बारा), २ फागुन । बाराको कलैया स्थित प्रादेशिक अस्पतालमा लामो समय पछि डाइलोसिस र इन्डोस्कोपी सेवा सुचारु भएको छ । बुधबार एक कार्यक्रमबीच मधेश प्रदेशका मुख्यमन्त्री सरोज यादवले अस्पतालका तीनवटा वार्डहरुको उद्घाटन गरेपछि यि सेवाहरु संचालनमा आएको हो ।
मुख्यमन्त्री यादवले अस्पतालमा डाइलोसिस, इन्डोस्कोपी र नवजात शिशुहरुको लागि एनआईसियु वार्डको उद्घाटन गरेसँगै बुधबारदेखि नै अस्पतालमा तीनवटै सेवाहरु संचालनमा आएको बताइएको छ । मुख्यमन्त्री यादवले आफुले नै संघको स्वास्थ राज्यमन्त्री हुँदा कलैयामा रहेको अस्पताललाई स्तरोन्नति गरि ५० शैया र त्यसपछि आफ्नै पहलमा १०० शैयाको अस्पताल बनाएको भन्दै हरेक जिल्लाको हरेक नागरिकले सहज उपचार प्राप्त गर्नको लागि आवश्यक सबै किसिमको सहयोग गर्ने प्रतिबद्धता जनाए ।
अस्पतालका मेडिकल सुपरिटेन्डेन्ट डा. अजय गुप्ताले डाइलोसिस सेवा शुरु भएसँगै दैनिक १५ जना असहाय गरिब बिपन्न बर्गकाले सेवाहरु प्राप्त गर्न सकिने बताए । अस्पतालको वार्ड उद्घाटनसँगै मुख्यमन्त्री यादवले अस्पतालको अनुगमन समेत गरेका थिए । अनुगमनको क्रममा मुख्यमन्त्रीलाई अस्पतालको बारेमा केही कुरा राख्दै मेसु गुप्ताले अस्पतालका लागि सिटि स्क्यान मेसिन र ईको मेसिनहरु उपलब्ध गराईदिन आग्रह समेत गरेका थिए । प्रादेशिक अस्पताल कलैयाले अब चाहिने सबै सेवा सुबिधाहरु बिस्तारै प्रवाह गर्दै जाने अस्पतालका मेडिकल सुपरिटेन्डेन्ट डा. गुप्ताको भनाई छ । 
प्रतिक्रिया दिनुहोस् !