रामलाई ससुरालीबाट चाँदीको तिर–धनुष कोसेली

जनकपुर (धनुषा), १९ पुस । भारतको आयोध्यामा नवनिर्मित राम मन्दिरका लागि जनकपुरबाट बिहीबार करिव ११ हजार वटा कोसेली पठाइएको छ । जनवरी २२ तारिखमा प्राण प्रतिष्ठा गरिने राम मन्दिरका लागि जनकपुरबाट करिब ५ सय थरिका ११ हजार वटा कोसेली पठाइएको हो । सुनचाँदीको गरगहना, फलफुल, पान–मखान, कपडा, मिठाइका अनेक ब्यञ्जन, चाँदीकै थाल–बटुको, श्रृंगारका सामाग्री र फर्निचरलगायतका समान भारतको आयोध्या पठाइएको हो ।

कोसेलीमा चाँदीले बनाइएको तिर–धनुष आकर्षक छ । चाँदीकै खराउ र अन्य आभुषण पनि पठाइएको छ । दुई वटा ट्रकमा कोसेली लिएर जानकी मन्दिरका महन्थ रामतपेश्वर दास, उनका उत्तराधिकारी महन्थ रामरोशन दाससहित जनकपुरका करिव ५ सय भन्दा बढी मानिस बिहीबार आयोध्या प्रस्थान गरेका छन् ।

आयोध्याको राम मन्दिर ट्रष्टलाई शनिबार कोसेली हस्तान्तरण गरिने महन्थ दासले बताए । कोसेली बोकेर आयोध्या प्रस्थान गरेका जनकपुरबासीलाई भने मधेश प्रदेशका मुख्यमन्त्री सरोजकुमार यादव, कांग्रेसका नेता बिमलेन्द्र निधि र जनकपुरधाम उप–महानगरका प्रमुख मनोज साहले बिदाई गरेका थिए ।

मुख्यमन्त्री यादवले हातमा कोसेली बोकेर जनकपुरको बिभिन्न भागको परिक्रमा गर्दै उनीहरुलाई बिदाई गरेका थिए । ‘माता सीताले ससुरालीमा नयाँ घर पाउनुभएको छ । हामी माइती पक्षका लागि यो सुखद खबर हो,’ मुख्यमन्त्री यादवले भने,‘त्यो नयाँ घरमा कुनै समानको अभाव नहोस् भनेर ससुराली जनकपुरबाट कोसेली पठाइएको छ ।’