बाराको प्रस्टोका एकै परिवारका तीन जना मृत अवस्थामा फेला

प्रसौनी (बारा), २६ असोज / बाराको प्रसौनी गाउँपालिका स्थित एकै परिवारका तीनजना मृत अवस्थामा फेला परेका छन् । बारा जिल्लाको प्रसौनी गाउँपालिका वडा नं. ५ प्रस्टोका गाउँदेखि करिब २ किलोमिटर उत्तरतर्फ एकै परिवारका तीनजनाको शव फेला परेको जिल्ला प्रहरी कार्यालय बाराले जनाएको छ ।
ढोरा खोला किनारामा शव रहेको दिउँसो करिब साढे २ बजेको समयमा प्राप्त जानकारीको आधारमा जिल्ला प्रहरी कार्यालय बाराबाट खटिएको प्रहरी टोली घटना स्थल पुगेको थियो । घटनास्थलबाट २५ वर्षीया सुजाता चौधरी, उनकी छोरी ३ वर्षीया ताहिरा चौधरी र १६ महिनाको राजवीर चौधरी मृत अवस्थामा भेटिएको जिल्ला प्रहरी कार्यालय बाराका प्रहरी उपरीक्षक होविन्द्र बोगटीले जानकारी दिए ।
एकै परिवारका तीन जना मृत अवस्थामा भेटिएका छन्, अनुसन्धानको लागि घटना स्थलमा प्रहरी टोली पुगिसकेको छ भन्दै प्रहरी उपरीक्षक बोगटीले आफू पनि घटना स्थलमा जान लागेको बताए । घटनाबारे थप अनुसन्धान भइरहको प्रहरी उपरीक्षक बोगटीको भनाई छ ।