वीरगंज (पर्सा), २१ असोज । बडादसैँ, तिहार, नेपाल संवत् तथा छठ पर्वलाई लक्षित गर्दै जिल्ला प्रहरी कार्यालय पर्साले विशेष सुरक्षा योजना लागू गरेको छ । चाडपर्वका समयमा बढ्ने आवतजावत, भीडभाड तथा सम्भावित आपराधिक गतिविधिलाई ध्यानमा राख्दै प्रहरीले आजदेखि सुरक्षा व्यवस्था थप कडा बनाएको हो । जिल्ला प्रहरी कार्यालय पर्साका प्रहरी नायब उपरीक्षक चक्रबहादुर मल्लका अनुसार चाडपर्वलाई शान्तिपूर्ण, सुरक्षित, मर्यादित र उल्लासमय वातावरणमा सम्पन्न गराउन विशेष सुरक्षा योजना कार्यान्वयनमा ल्याइएको हो ।
चाडपर्वका बेला शान्ति सुरक्षामा चुनौती सिर्जना गर्न सक्ने आपराधिक गतिविधि नियन्त्रण तथा सम्भावित घटना हुन नदिन प्रहरीले निगरानी, गस्ती र चेकजाँचलाई प्रभावकारी बनाउने जनाएको छ । बजार, व्यापारिक केन्द्र, सार्वजनिक यातायात तथा धार्मिक र सांस्कृतिक गतिविधि हुने क्षेत्रमा सुरक्षा उपस्थितिसमेत बढाइने प्रहरीले जनाएको छ ।
चाडपर्वको समयमा हुने भीडभाडलाई अपराधीले फाइदा उठाउन सक्ने भएकाले प्रहरीले विशेष निगरानी बढाएको हो । सार्वजनिक स्थानमा हुने गतिविधि, यात्रुको आवतजावत र संवेदनशील क्षेत्रमा सुरक्षाकर्मीको परिचालनलाई प्राथमिकतामा राखिएको जिल्ला प्रहरी कार्यालयले जनाएको छ । प्रहरीले सवारी चालकलाई ‘मादक पदार्थ सेवन गरेर सवारी नचलाउन’ आग्रह गरेको छ । त्यस्तै, जुवातास खेल्ने तथा खेलाउने गतिविधिबाट टाढा रहन र आतसबाजी नगर्नसमेत प्रहरीले सर्वसाधारणलाई अपिल गरेको छ ।
जिल्ला प्रहरी कार्यालयले चाडपर्व सुरक्षित बनाउन प्रहरीको मात्र प्रयास पर्याप्त नहुने भन्दै नागरिकको सहयोग आवश्यक रहेको जनाएको छ । आपराधिक गतिविधि वा शंकास्पद क्रियाकलापबारे समयमै प्रहरीलाई जानकारी गराएर सुरक्षित समाज निर्माणमा सहयोग गर्न सबैलाई अनुरोध गरिएको छ । प्रहरीका अनुसार चाडपर्वका क्रममा हुने मानिसको आवतजावत, बजार तथा व्यापारिक क्षेत्रमा बढ्ने भीड, सार्वजनिक यातायातमा पर्ने अतिरिक्त चाप र धार्मिक तथा सांस्कृतिक गतिविधिलाई मध्यनजर गर्दै विशेष निगरानी, नियमित गस्ती तथा चेकजाँचलाई थप सुदृढ र जनमैत्री बनाइएको छ ।
प्रहरीले सबै नागरिकलाई संयमित र सुरक्षित ढंगले चाडपर्व मनाउँदै आफू, आफ्नो परिवार र समुदायको सुरक्षाप्रति समेत सचेत रहन आग्रह गरेको छ । 
प्रतिक्रिया दिनुहोस् !