वीरगंज (पर्सा), २८ भदौ । आगामी सेप्टेम्बरमा जापानमा आयोजना हुने एसियन गेम्सका लागि नेपाली क्रिकेट टोली घोषणा गरिएको छ । नेपाल ओलम्पिक कमिटीले आइतबार दीपेन्द्रसिंह ऐरीको कप्तानीमा १५ सदस्यीय नेपाली टोली सार्वजनिक गरेको हो । जापान जाने नेपाली टोलीमा वीरगंजका सहोदर दाजुभाइ आरिफ शेख र आसिफ शेखले पनि स्थान बनाएका छन् ।
एउटै परिवारका दुई क्रिकेटरले एसियन गेम्सजस्तो अन्तर्राष्ट्रिय प्रतियोगिताका लागि एकैपटक नेपाली टोलीमा स्थान बनाएपछि वीरगञ्जको क्रिकेट क्षेत्रमा समेत उत्साह थपिएको छ । दीपेन्द्रसिंह ऐरीको कप्तानीमा घोषणा गरिएको टोलीमा रोहितकुमार पौडेल, सोमपाल कामी, करण केसी, सन्दीप लामिछाने, कुशल भुर्तेल, ललित राजवंशी, गुल्सनकुमार झा, नन्दन यादव, लोकेश बम, सन्दीप जोरा, शेर मल्ल, कुशल मल्ल तथा आरिफ र आसिफ शेख रहेका छन् ।
नेपालले एसियन गेम्सअन्तर्गत क्रिकेटमा अफगानिस्तान र आयोजक जापानसँग प्रतिस्पर्धा गर्नेछ । बलियो अन्तर्राष्ट्रिय टोलीबीच हुने प्रतिस्पर्धाका लागि नेपाली टोलीले समेत अनुभवी तथा युवा खेलाडीको संयोजन पाएको छ । विशेषगरी वीरगञ्जका आरिफ र आसिफ शेख दाजुभाइको छनोटले नेपाली क्रिकेटमा वीरगञ्जको योगदानलाई पुनः अन्तर्राष्ट्रिय मञ्चमा जोडेको छ । दुवै खेलाडीले यसअघि पनि नेपाली राष्ट्रिय क्रिकेट टोलीबाट विभिन्न अन्तर्राष्ट्रिय प्रतियोगितामा प्रतिनिधित्व गरिसकेका छन् ।
एसियन गेम्समा नेपाली टोलीको प्रदर्शनसँगै आरिफ–आसिफ दाजुभाइको सहभागितालाई वीरगञ्जका क्रिकेटप्रेमीहरूले समेत चासोका साथ हेर्ने भएका छन् ।
प्रतिक्रिया दिनुहोस् !