जितपुरसिमर (बारा), २८ भदौ । बाराको जीतपुरसिमरा उपमहानगरपालिका–५ बकुलियाबाट एकै परिवारका तीन बालबालिका एकैपटक सम्पर्कविहीन भएपछि प्रहरीले खोजी अभियान तीव्र बनाएको छ । भारत स्थायी घर भई हाल बकुलियामा बस्दै आएका मुकेश पासवानका १०, ७ र ५ वर्षका तीन छोराछोरी आइतबार बिहान घरबाट निस्किएपछि सम्पर्कविहीन भएका हुन् ।
परिवारका अनुसार १० वर्षीया काजल, ७ वर्षीया सुन्दरी र ५ वर्षीय धिरज बिहान करिब ५ बजेदेखि बेखबर छन् । घरबाट बाहिरिएपछि लामो समयसम्म पनि उनीहरू सम्पर्कमा नआएपछि परिवारले खोजी गर्दा अवस्था पत्ता नलागेको हो । तीनै बालबालिका एकैपटक सम्पर्कविहीन भएपछि परिवारले प्रहरीमा निवेदन दिएर खोजीका लागि सहयोग मागेको छ । घटनाको जानकारी पाएलगत्तै प्रहरीले सम्भावित स्थानमा खोजी सुरु गरेको जनाएको छ ।
बाराका प्रहरी प्रवक्ता एवं प्रहरी नायब उपरीक्षक मिनबहादुर घलेले बालबालिकाको खोजीका लागि प्रहरी टोली परिचालन गरिएको जानकारी दिएका छन् । उनका अनुसार बालबालिकाको तस्वीर तथा हुलियासहित जिल्लाका विभिन्न प्रहरी कार्यालयमा समेत सूचना पठाइएको छ । बालबालिकाको खोजीका लागि जीतपुरस्थित इलाका प्रहरी कार्यालयबाट प्रहरी टोली परिचालन गरिएको छ । प्रहरीले उनीहरू पुग्न सक्ने सम्भावित स्थान तथा आसपासका क्षेत्रमा खोजी र निगरानी बढाएको जनाएको छ ।
एकै परिवारका तीन बालबालिका बिहानैदेखि सम्पर्कविहीन भएपछि परिवारजन चिन्तित बनेका छन् । प्रहरीले बालबालिकाको अवस्थाबारे कुनै जानकारी प्राप्त भए तत्काल प्रहरीलाई खबर गर्न आग्रह गर्दै खोजी कार्यलाई तीव्रता दिएको छ ।
प्रतिक्रिया दिनुहोस् !