काठमाडौँ, २८ भदौ । आर्थिक संकटसँग जुधिरहेका छापा सञ्चारमाध्यमलाई सरकारले उपलब्ध गराउँदै आएको लोककल्याणकारी विज्ञापनको रकम कटौती नगर्न माग गर्दै छापा माध्यम बचाउ सुझाव कार्यदलले नेकपा (एमाले) का अध्यक्ष केपी शर्मा ओलीको ध्यानाकर्षण गराएको छ । कार्यदलका प्रतिनिधिले आइतबार एमाले केन्द्रीय कार्यालय च्यासल पुगेर अध्यक्ष ओलीलाई ध्यानाकर्षणपत्र बुझाउँदै छापा सञ्चारमाध्यमले पछिल्लो समय भोगिरहेका आर्थिक तथा व्यावसायिक चुनौतीबारे जानकारी गराएका हुन् ।
कार्यदलले छापा माध्यमको आम्दानी निरन्तर कमजोर हुँदै गएको अवस्थामा लोककल्याणकारी विज्ञापनबापत प्राप्त हुने रकमसमेत घटाइए नियमित प्रकाशनमा गम्भीर असर पर्ने जनाएको छ । विज्ञापनको रकम कटौतीले सञ्चारमाध्यमको सञ्चालन मात्र नभई त्यहाँ कार्यरत पत्रकार तथा कर्मचारीको रोजगारीसमेत प्रत्यक्ष प्रभावित हुने कार्यदलको भनाइ छ । छापा सञ्चारमाध्यमको संरक्षण, प्रवद्र्धन र निरन्तरताका लागि राज्यले प्रदान गर्दै आएको लोककल्याणकारी विज्ञापनलाई निरन्तरता दिनुपर्नेमा कार्यदलले जोड दिएको छ । सञ्चार क्षेत्रलाई थप संकटमा धकेल्ने गरी विज्ञापनको रकम कटौती नगर्न सरकारको ध्यानाकर्षण गराउँदै कार्यदलले विद्यमान सहयोगलाई प्रभावकारी रूपमा कायम राख्न आग्रह गरेको हो ।
नेपाल पत्रकार महासङ्घ, उपत्यका प्रदेश कमिटीको तर्फबाट गठन गरिएको कार्यदलका संयोजक दामोदर दवाडीसहितको टोलीले अध्यक्ष ओलीसँग छापा सञ्चारमाध्यमको वर्तमान अवस्था, बढ्दो आर्थिक संकट तथा सञ्चार क्षेत्रलाई दीर्घकालीन रूपमा टिकाउ बनाउन आवश्यक नीतिगत व्यवस्थाका विषयमा छलफल गरेको थियो । छापा माध्यमको आर्थिक आधार कमजोर बन्दै जाँदा लोककल्याणकारी विज्ञापनबाट प्राप्त हुने सरकारी सहयोगलाई सञ्चारमाध्यमको नियमित प्रकाशन र पत्रकारको रोजगारी जोगाउने महत्वपूर्ण आधारका रूपमा कार्यदलले प्रस्तुत गरेको थियो ।
भेटका क्रममा अध्यक्ष ओलीले प्रेस तथा अभिव्यक्ति स्वतन्त्रताको पक्षमा आफूहरू स्पष्ट रहेको बताएका थिए । उनले लोककल्याणकारी विज्ञापनको अवधारणाको पक्षमा समेत आफ्नो समर्थन रहेको स्पष्ट गरेको कार्यदलले जनाएको छ । छापा सञ्चारमाध्यमको आर्थिक संकट गहिरिँदै गएको अवस्थामा लोककल्याणकारी विज्ञापनको रकम कटौती भए त्यसको प्रत्यक्ष असर प्रकाशनको निरन्तरता र सञ्चारकर्मीको रोजगारीमा पर्न सक्ने भन्दै कार्यदलले राज्यबाट उपलब्ध हुँदै आएको सहयोगलाई थप व्यवस्थित र निरन्तर बनाउनुपर्नेमा जोड दिएको छ ।
प्रतिक्रिया दिनुहोस् !