वीरगंज (पर्सा), २८ भदौ । पर्साको पोखरिया नगरपालिका–३ बसन्तपुरस्थित श्री नेपाल राष्ट्रिय प्राथमिक विद्यालयको भौतिक पूर्वाधार विकासका लागि ७६ लाख ५९ हजार ५ सय रुपैयाँ बराबरको सहयोग परियोजना स्वीकृत भएको छ । विद्यालयको जीर्ण तथा अपर्याप्त भौतिक संरचनाका कारण समस्या झेल्दै आएका विद्यार्थी र अभिभावकका लागि भवन निर्माणको परियोजना स्वीकृत भएपछि स्थानीयस्तरमा खुसी छाएको छ ।
ग्रामीण क्षेत्रका बालबालिकालाई सुरक्षित, व्यवस्थित र गुणस्तरीय शैक्षिक वातावरण उपलब्ध गराउने उद्देश्यले विद्यालय भवन निर्माणका लागि उक्त परियोजना अघि बढाइएको हो । लायन्स क्लब इन्टरनेशनल डिस्ट्रिक ३२५ एस. को प्रथम डिस्ट्रिक क्याबिनेट मिटिङबाट परियोजना स्वीकृत गर्ने निर्णय भएको जनाइएको छ । विद्यालयको भौतिक अवस्था सुधारका लागि परियोजना स्वीकृत गराउन लायन्स क्लब अफ पोखरियाका अध्यक्ष लायन नेजामुद्दीन शमानीले सक्रिय पहल र समन्वय गर्दै आएको क्लबले जनाएको छ । उनको पहलमा विद्यालय भवन निर्माणका लागि ठूलो बजेटको परियोजना स्वीकृत भएको हो ।
परियोजना कार्यान्वयनमा आएपछि विद्यालयको लामो समयदेखिको भौतिक पूर्वाधारको समस्या समाधान हुने अपेक्षा गरिएको छ । भवन निर्माणपछि विद्यार्थीले सुरक्षित कक्षाकोठामा अध्ययन गर्ने अवसर पाउनुका साथै विद्यालयको समग्र शैक्षिक वातावरणमा समेत सुधार आउने विश्वास गरिएको छ । विशेषगरी ग्रामीण तथा विपन्न समुदायका बालबालिका अध्ययन गर्ने विद्यालय भएकाले भवन निर्माण परियोजनालाई स्थानीय शिक्षाको विकासमा महत्वपूर्ण कदमका रूपमा लिइएको छ ।
आवश्यक भौतिक संरचना अभावमा पठनपाठनमा देखिने समस्या कम हुनुका साथै विद्यार्थीको नियमित अध्ययनमा समेत सकारात्मक प्रभाव पर्ने अपेक्षा गरिएको छ । परियोजना स्वीकृत गराउन पहल, समन्वय र सहयोग गरेको भन्दै लायन्स क्लब अफ पोखरिया परिवारले लायन्स क्लब इन्टरनेशनल डिस्ट्रिक ३२५ एस. का अध्यक्ष लायन रामबिहारी पाण्डेयसहित सम्पूर्ण पदाधिकारी, सदस्य तथा सहयोगीहरूप्रति आभार व्यक्त गरेको छ ।
परियोजना स्वीकृत भएको अवसरमा लायन्स क्लब अफ पोखरियाका अध्यक्ष लायन नेजामुद्दीन शमानीलाई लायन्स क्लबको पिन लगाएर सम्मानसमेत गरिएको थियो । सम्मानपछि शमानीले आफूले पाएको माया, विश्वास र सम्मानले थप जिम्मेवारीबोध भएको बताउँदै विद्यालय भवन निर्माण परियोजनालाई सफल बनाउन सबै पक्षको सहयोग र सहकार्य आवश्यक रहेको उल्लेख गरे ।
विद्यालय भवन निर्माणको परियोजना स्वीकृत भएको खबरले बसन्तपुरका स्थानीय अभिभावकहरूमा समेत उत्साह थपिएको छ । लामो समयदेखि विद्यालयको भौतिक संरचना सुधारको आवश्यकता महसुस गर्दै आएका अभिभावकले भवन निर्माण भएपछि आफ्ना बालबालिकाले अझ सुरक्षित र सहज वातावरणमा अध्ययन गर्न पाउने विश्वास व्यक्त गरेका छन् ।
७६ लाख ५९ हजार ५ सय रुपैयाँको उक्त सहयोग परियोजना प्रभावकारी रूपमा कार्यान्वयनमा आएमा बसन्तपुरस्थित श्री नेपाल राष्ट्रिय प्राथमिक विद्यालयको भौतिक स्वरूपमा उल्लेख्य परिवर्तन आउने मात्र होइन, ग्रामीण क्षेत्रका बालबालिकाको शैक्षिक वातावरण सुधारमा समेत महत्वपूर्ण योगदान पुग्ने अपेक्षा गरिएको छ ।
प्रतिक्रिया दिनुहोस् !