जनकपुरधाम । धनुषामा लामो समयदेखि जग्गाधनी पुर्जाविहीन रहेका परिवारलाई पुर्जा वितरण गर्ने अभियानलाई तीव्रता दिइएको छ । नाप नक्सा सम्पन्न भए पनि दर्ता प्रक्रिया पूरा हुन नसकेका गाउँ ब्लक तथा स्ववासी प्रकृतिका जग्गाको समस्या समाधान गर्दै नापी कार्यालय धनुषाले पुर्जा वितरण अभियान अघि बढाएको हो ।
यसक्रममा शनिबार सबैला नगरपालिका–८, साविक ठिला यदुवा गाविसका ३८५ परिवारलाई जग्गाधनी पुर्जा वितरण गरिएको छ । नापी कार्यालयका अनुसार ती जग्गाको नाप नक्सा २०७८ सालमै सम्पन्न भएको थियो । यसअघि भदौ महिनामा धनुषाका तीन स्थानीय तहका १ हजार ८५ परिवारलाई पुर्जा वितरण गर्ने योजना बनाइएको थियो । तर सबैलामा ३८५ परिवारलाई पुर्जा वितरण भएपछि अद्यावधिक तथ्यांकअनुसार अब हंसपुर र क्षिरेश्वरनाथमा हुने वितरणसहित कुल १ हजार ११० परिवारले पुर्जा पाउने भएका छन् ।
नापी कार्यालयका अनुसार भदौ २९ गते हंसपुर नगरपालिका–५, साविक सुगा निकास गाविसका ३५० परिवारलाई पुर्जा वितरण गर्ने तयारी छ । त्यस्तै, भदौ ३१ गते क्षिरेश्वरनाथ नगरपालिका–१ र २, साविक रमदैया भवाडी गाविसका ३७५ परिवारलाई पुर्जा वितरण गर्ने कार्यक्रम छ । नापी कार्यालय धनुषाका प्रमुख उमेश कुमारले नाप नक्सा सम्पन्न भएका तर दर्ता प्रक्रिया बाँकी रहेका गाउँ ब्लक तथा स्ववासी प्रकृतिका जग्गाको समस्या समाधानलाई प्राथमिकतामा राखिएको बताए । उनका अनुसार नाप नक्सा सम्पन्न हुँदैमा मात्र जग्गाको स्वामित्व पूर्णरूपमा स्थापित हुँदैन ।
त्यसपछि आवश्यक कानुनी तथा प्रशासनिक प्रक्रिया पूरा गर्नुपर्ने भएकाले स्थानीयको सहभागिता, आवश्यक कागजात र कानुनी प्रक्रिया पूरा गराउँदै दर्ता तथा पुर्जा वितरणको काम अघि बढाइएको छ । पुर्जा प्राप्त भएपछि वर्षौँदेखि जग्गाको स्वामित्वसम्बन्धी समस्या भोग्दै आएका परिवारलाई आफ्नो सम्पत्तिमाथिको कानुनी अधिकार सुनिश्चित गर्न सहज हुने नापी कार्यालयले जनाएको छ ।
प्रतिक्रिया दिनुहोस् !