कलैया (बारा), २५ भदौ । बाराको प्रादेशिक अस्पताल कलैयामा एक्सरे सेवा लामो समयदेखि प्रभावित हुँदा उपचारका लागि अस्पताल पुग्ने दैनिक दर्जनौँ सेवाग्राही समस्यामा परेका छन् । अस्पतालको एक्सरे मेसिन बिग्रिएपछि सामान्य परीक्षणका लागि समेत बिरामीहरू निजी क्लिनिक तथा डायग्नोस्टिक सेन्टरमा जानुपर्ने बाध्यता सिर्जना भएको छ । अस्पतालमा उपचारका लागि आउने बिरामीको चाप ठूलो भएपनि महत्वपूर्ण स्वास्थ्य उपकरण सञ्चालनमा नहुँदा सेवाग्राहीले प्रत्यक्ष मार खेप्नुपरेको हो ।
विशेषगरी चिकित्सकले एक्सरे गर्न सिफारिस गरेका बिरामीहरू अस्पतालमै सेवा नपाएपछि बाहिरबाट परीक्षण गराउन बाध्य भएका छन् । अस्पताल स्रोतका अनुसार एक्सरे मेसिन बिग्रिनुमा अस्पतालभित्रकै संलग्नता हुन सक्ने आशंका गरिएको छ । स्रोतले मेसिन सञ्चालनमा नरहेको अवस्थामा बिरामीलाई निजी क्लिनिकतर्फ पठाउने र त्यसबाट कमिसन आउने गरेको आरोपसमेत लगाएको छ ।
मेसिन बिग्रियो, प्रशासन मौन
एक्सरे मेसिन बिग्रिएपछि त्यसको तत्काल मर्मत तथा सेवा पुनः सञ्चालनका लागि अस्पताल प्रशासनले प्रभावकारी पहल नगरेको भन्दै प्रश्न उठेको छ । एक्सरे मेसिन मात्र नभई एलएफटी लगायतका विभिन्न परीक्षणमा प्रयोग हुने केमिकल तथा उपकरणको व्यवस्थापनमा समेत अस्पताल प्रशासनको उदासीनता देखिएको आरोप छ ।
आवश्यक उपकरण तथा परीक्षण सामग्री उपलब्ध गराउनेभन्दा समस्या लम्ब्याउने प्रवृत्ति देखिएको भन्दै कमिसनको चलखेल हुन सक्ने आशंका गरिएको छ । अस्पतालभित्रका उपकरण बिग्रिँदा त्यसको प्रत्यक्ष असर बिरामीमाथि पर्ने गरेको छ । सरकारी अस्पतालमा सस्तो तथा सहज रूपमा उपलब्ध हुनुपर्ने परीक्षण सेवा बन्द हुँदा आर्थिक रूपमा कमजोर बिरामीसमेत निजी स्वास्थ्य संस्थामा महँगो शुल्क तिर्न बाध्य हुने अवस्था बनेको छ ।
हजारौँ बिरामी आउने अस्पताल, सेवा भने कमजोर
प्रादेशिक अस्पताल कलैयामा दैनिक दीर्घरोगीसहित ठूलो संख्यामा बिरामी उपचारका लागि आउने गरेको अस्पतालको तथ्यांकले देखाउँछ । तर बिरामीको चापअनुसार सेवा विस्तार र उपकरण व्यवस्थापन हुन नसक्दा अस्पताल प्रभावकारी स्वास्थ्य सेवा केन्द्रभन्दा ‘भर्ना गर्ने केन्द्र’मा सीमित हुँदै गएको गुनासो बढेको छ ।
नागरिक समाज बाराका अध्यक्ष उमेशलाल दासले अस्पतालमा गुणस्तरीय सेवा उपलब्ध हुन नसकेको र सेवाग्राहीलाई आवश्यक औषधिसमेत सहज रूपमा उपलब्ध गराउन नसकिएको बताएका छन् । उनका अनुसार प्रतिस्पर्धात्मक प्रक्रिया र पर्याप्त सूचना नदिई आफूनिकट व्यक्तिहरूलाई नियुक्त गर्ने प्रवृत्तिले अस्पतालको सेवा प्रणाली कमजोर बन्दै गएको छ ।
औषधि खरिदमा पनि कमिसनको आशंका
अस्पतालको सेवा प्रवाहसँगै औषधि खरिद प्रक्रियामाथि समेत गम्भीर प्रश्न उठाइएको छ । अस्पतालमा टेन्डर प्रक्रियाबिना आफूअनुकूल आपूर्तिकर्ताबाट औषधि खरिद गर्ने र त्यसमा कमिसनको स्वार्थ जोडिने गरेको आरोप लगाइएको छ । अझ कम समयमै म्याद सकिने औषधि खरिद गर्ने गरिएको दाबीसमेत गरिएको छ ।
अस्पतालको अभिलेखमा औषधि खरिद भएको देखाउने तर छोटो समयमै म्याद सकिने औषधि पुनः खरिद गर्नुपर्ने अवस्था सिर्जना गर्दा आर्थिक चलखेल हुने गरेको आरोप छ । यसरी एउटै औषधि पटक–पटक खरिद गर्ने वातावरण बनाएर कमिसन असुल्ने गरिएको आशंका गरिएको हो । यो केवल प्रशासनिक कमजोरीको विषय नभई बिरामीको स्वास्थ्य र सार्वजनिक रकम दुवैमाथिको गम्भीर खेलबाड हो ।
सरकारी अस्पतालमा उपकरण बिग्रिनु सामान्य प्राविधिक समस्या हुन सक्छ । तर उपकरण बिग्रिएपछि मर्मतमा ढिलाइ हुनु, बिरामीलाई निजी संस्थामा जानुपर्ने अवस्था आउनु र त्यहीबीच कमिसनको आरोप उठ्नु भने सामान्य विषय होइन । प्रादेशिक अस्पताल कलैया प्रदेशकै महत्वपूर्ण स्वास्थ्य संस्था हो । हजारौँ नागरिकको उपचारसँग प्रत्यक्ष जोडिएको अस्पतालमा सेवा प्रभावकारी बनाउन उपकरण नियमित सञ्चालन, आवश्यक परीक्षण सामग्रीको उपलब्धता, औषधि खरिदमा पारदर्शिता र कर्मचारी नियुक्तिमा प्रतिस्पर्धात्मक प्रक्रिया अनिवार्य छ ।
प्रतिक्रिया दिनुहोस् !