वीरगंज (पर्सा), २४ भदौ । वीरगंज गण्डक देखि मितेरी पुलसम्म राजमार्ग सीमा भित्रका संरचना हटाउने बाँकी काम एक साताभित्र सम्पन्न गर्ने लक्ष्यसहित सडक डिभिजन कार्यालय हेटौंडाले काम तीव्र पारेको छ । सडक सीमाभित्र रहेका अधिकांश संरचना हटाइसकिएको र सिद्धार्थ बैंक, पमपम बिल्डिङ तथा हनुमान मन्दिर पछाडिका केही बाँकी संरचना हटाउने काम भइरहेको सडक डिभिजनका फोकल पर्सन तथा इन्जिनियर दुर्गाप्रसादले जानकारी दिए ।
घण्टाघरदेखि माइस्थान चोकसम्म केही भवनको सडक सीमाबारे अन्योल रहेकाले पुनः नापजाँच गरिने भएको छ । नापजाँचसहित मुख्य सडक विस्तारको सम्पूर्ण काम आगामी सोमबारसम्म सम्पन्न गर्ने लक्ष्य रहेको डिभिजनले जनाएको छ । यसअघि सडक सीमाभित्र पर्ने संरचना हटाउन घरधनीलाई समय दिइए पनि बाँकी रहेपछि डोजर परिचालन गरी संरचना हटाउने काम अघि बढाइएको हो ।
यसैबिच, वीरगन्जको मुख्य सडक विस्तार कार्य अन्तर्गत सडकको दायाँबायाँ २५/२५ मिटर क्षेत्र खाली गराउने काम चलिरहेका बेला घण्टाघर क्षेत्र विवादमा तानिएको छ । घण्टाघरस्थित नेपाल टेलिकमको स्वामित्वमा रहेको जग्गा तथा ऐतिहासिक भवनमा सडक डिभिजन कार्यालय हेटौंडाले नक्सा भन्दा बढी दाबी गरेको भन्दै टेलिकमले आपत्ति जनाएको छ ।
टेलिकमले सडक डिभिजनको निर्णयविरुद्ध अदालतमा समेत कानूनी उपचार खोजेको जनाउदै, टेलिकम प्रादेशिक कार्यालय, वीरगन्जका निर्देशक श्रीभद्र घिमिरेले, सडक विस्तार कार्यसँग टेलिकमको कुनै विवाद नरहेको, तर सडक डिभिजन कार्यालयको पछिल्लो कार्यशैली पक्षपातपूर्ण देखिएकोे बताए ।
प्रतिक्रिया दिनुहोस् !