वीरगंज (पर्सा), २४ भदौ । ठगी तथा विश्वासघातसम्बन्धी आरोपमा पक्राउ परेका नापी कार्यालयका पूर्वकर्मचारी सञ्जय कुमार ठाकुरलाई पर्सा जिल्ला अदालतले पाँच दिन हिरासतमा राखेर अनुसन्धान गर्न प्रहरीलाई अनुमति दिएको छ । काठमाडौंको शान्तिनगरबाट मंगलबार पक्राउ परेका ठाकुरलाई बुधबार पर्सा ल्याइएको थियो । जिल्ला प्रहरी कार्यालय पर्साले आवश्यक अनुसन्धानका लागि उनलाई अदालतमा उपस्थित गराएपछि अदालतले पाँच दिन हिरासतमा राख्न अनुमति दिएको हो ।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक चक्रबहादुर मल्लका अनुसार ठाकुरविरुद्ध गत असोज ४ गते ठगीसम्बन्धी मुद्दा दर्ता भएको थियो । सोही मुद्दामा थप अनुसन्धान अघि बढाउने क्रममा उनलाई काठमाडौंमा पक्राउ गरिएको हो । प्रहरीका अनुसार ठाकुर लामो समयदेखि वीरगञ्जका विभिन्न घरजग्गा तथा आर्थिक विवादसँग जोडिँदै आएका थिए । विशेषगरी नबिल बैंक, एनआईसी एसिया बैंक, पूजन होटल र स्काइलाइन मलसँग सम्बन्धित जग्गा विवादमा समेत उनको नाम जोडिएको प्रहरी स्रोतको भनाइ छ । यद्यपि, ती विवादमा उनको वास्तविक भूमिका र संलग्नताबारे सम्बन्धित निकायबाट अन्तिम निष्कर्ष सार्वजनिक हुन बाँकी छ ।
घरजग्गा विवादमा लामो समयदेखि चर्चामा
सर्लाहीको बलरा नगरपालिका–८ स्थायी घर भएका ठाकुर नापी कार्यालयका पूर्वकर्मचारी हुन् । सरकारी सेवामा रहँदा नापीसम्बन्धी काममा संलग्न रहेका उनी सेवा छाडेपछि भने विभिन्न घरजग्गासम्बन्धी विवादका कारण चर्चामा आउँदै आएका थिए । प्रहरीले अहिले दर्ता भएको ठगीसम्बन्धी मुद्दालाई केन्द्रमा राखेर अनुसन्धान अघि बढाएको छ । पाँच दिनको हिरासत अनुमति पाएसँगै प्रहरीले आरोपसँग सम्बन्धित कागजात, आर्थिक कारोबार, जग्गासम्बन्धी विवरण तथा अन्य प्रमाणहरू संकलन गर्ने तयारी गरेको छ ।
नक्कली शैक्षिक प्रमाणपत्र प्रकरणमा अख्तियारको मुद्दा
ठाकुरको विगत पनि विवादमुक्त देखिँदैन । उनीविरुद्ध अख्तियार दुरुपयोग अनुसन्धान आयोगले नक्कली शैक्षिक प्रमाणपत्र पेस गरी अधिकृत पदमा बढुवा भएको आरोपमा मुद्दा दायर गरेको विवरण सार्वजनिक भएको छ । उक्त मुद्दामा दोषी ठहर भएपछि ठाकुरले सरकारी सेवाबाट राजीनामा दिएको बताइएको छ । सरकारी सेवामा रहँदा नै विवादमा परेका ठाकुर सेवा छाडेपछि पनि घरजग्गा तथा आर्थिक कारोबारसँग सम्बन्धित विवादमा जोडिँदै आएको आरोप लाग्दै आएको थियो । सरकारी सेवामा प्रवेश गर्नुअघि ठाकुरले तत्कालीन कृषि मन्त्री महन्त ठाकुरको सचिवालयमा काम गरेको तथा केही समय हुलाक कार्यालयमा करार सेवामा समेत कार्यरत रहेको बताइन्छ ।
पक्राउसँगै पुराना विवाद फेरि चर्चामा
ठगीसम्बन्धी मुद्दामा ठाकुर पक्राउ परेसँगै वीरगञ्जमा उनीसँग जोडिएका पुराना घरजग्गा विवादहरू पनि पुनः चर्चामा आएका छन् । विशेषगरी बैंक, होटल तथा व्यावसायिक प्रतिष्ठानसँग सम्बन्धित जग्गा विवादमा उनको नाम जोडिनुले पछिल्लो पक्राउलाई थप चासोका साथ हेरिएको छ । प्रहरीले भने अहिलेको अनुसन्धानलाई दर्ता भएको ठगीसम्बन्धी मुद्दामै केन्द्रित रहेको जनाएको छ । विगतमा विभिन्न विवादमा नाम जोडिएको आधारमा मात्र कसैलाई दोषी ठहर गर्न नसकिने भएकाले प्रमाणका आधारमा अनुसन्धान अघि बढाउनुपर्ने देखिन्छ ।
अदालतबाट पाँच दिनको हिरासत अनुमति पाएपछि अब प्रहरीले ठाकुरविरुद्धको आरोपसँग सम्बन्धित प्रमाणहरू संकलन, बयान तथा कारोबारसम्बन्धी विवरणको अध्ययन गर्नेछ । ठगीको आरोपमा वास्तविकता के हो, कसरी र कसलाई ठगी गरिएको हो तथा त्यसमा ठाकुरको भूमिका कस्तो थियो भन्ने विषय अनुसन्धानपछि मात्र स्पष्ट हुनेछ । तर, नापी कार्यालयको पूर्वकर्मचारीका रूपमा काम गरिसकेका व्यक्ति पटक–पटक घरजग्गा तथा आर्थिक विवादमा जोडिनु र पछिल्लो समय ठगीसम्बन्धी मुद्दामा पक्राउ पर्नुले वीरगंजको घरजग्गा कारोबारमा हुने विवाद, कागजातको विश्वसनीयता र आर्थिक लेनदेनमाथि समेत गम्भीर प्रश्न उठाएको छ ।
प्रतिक्रिया दिनुहोस् !