वीरगंज (पर्सा), २३ भदौ । नेकपा एमालेका महासचिव शंकर पोखरेलले वीरगंज महानगर कमिटीको अध्यक्ष चयनसम्बन्धी विवाद स्थानीय र जिल्ला तहमै समाधान गर्न निर्देशन दिएका छन् । वर्दिवासमा आयोजित मधेश प्रदेशस्तरीय ‘मिशन पार्टी जागरण अभियान’को समीक्षा बैठकमा महासचिव पोखरेलले पार्टीभित्रका स्थानीय समस्या समाधानमा माथिल्लो तहबाट अनावश्यक हस्तक्षेप नगर्न आग्रह गरेका हुन् ।
यसैबीच, एमाले केन्द्रीय सदस्य प्रभु हजराले वीरगंज महानगर अध्यक्षमा सुन्दर प्रसाद कुर्मीको नियुक्ति बदर भएको भन्ने सूचना निराधार रहेको दाबी गरेका छन् । उनले पूर्वमेयर विजय सरावगीले गलत विज्ञप्तिका आधारमा कुर्मीलाई हटाइएको सूचना प्रवाह गरेको आरोप लगाएका हुन् । यता, सरावगीले भने आफूले प्राप्त गरेको विज्ञप्तिकै आधारमा पिन्टु उपाध्यायमार्फत सूचना पठाएको प्रस्टीकरण दिएका छन् ।
प्रतिक्रिया दिनुहोस् !