वीरगंज (पर्सा), २३ भदौ । रसुवाको भोटेकोशीमा आएको विनाशकारी बाढीबाट प्रभावित नागरिकको उद्धार तथा राहतका लागि पर्सा र बाराबाट सहयोग जुट्ने क्रम तीव्र बनेको छ । स्थानीय तहदेखि शैक्षिक संस्था, शिक्षक–कर्मचारी, विद्यार्थी, युवा क्लब तथा व्यवसायी–समाजसेवीसम्मले आ–आफ्नो क्षेत्रबाट सहयोगको हात अघि बढाएका छन् । यसै क्रममा पर्साको बहुदरमाई नगरपालिकाले भोटेकोशी बाढीपीडितका लागि प्रधानमन्त्री दैवी प्रकोप उद्धार कोषमा २५ लाख ११ हजार १ सय रुपैयाँ सहयोग गर्ने निर्णय गरेको छ ।
नगरपालिकाका अनुसार उक्त रकममध्ये कार्यालयको तर्फबाट ५ लाख ७५ हजार रुपैयाँ, जनप्रतिनिधिबाट १ लाख ७२ हजार रुपैयाँ तथा कर्मचारी, शिक्षक र स्वास्थ्यकर्मीलगायतबाट १७ लाख ६४ हजार १ सय रुपैयाँ संकलन गरी कोषमा जम्मा गरिनेछ । भोटेकोशी बाढीबाट भएको ठूलो जनधनको क्षतिप्रति दुःख व्यक्त गर्दै बहुदरमाई नगरपालिकाले मृतकप्रति श्रद्धाञ्जली तथा शोकसन्तप्त परिवारप्रति समवेदना प्रकट गरेको छ । विपद्को कठिन समयमा प्रभावित नागरिकको उद्धार तथा राहतका लागि सबै पक्षलाई सहयोग गर्नसमेत नगरपालिकाले आग्रह गरेको छ ।
प्याब्सन पर्साबाट १५ लाख सहयोग
बाढीपीडितका लागि निजी तथा आवासीय विद्यालय संगठन नेपाल (प्याब्सन) पर्साले पनि १५ लाख रुपैयाँ राहत सहयोग गरेको छ । प्याब्सन पर्सामा आबद्ध ४० भन्दा बढी विद्यालयका अभिभावक, शिक्षक–कर्मचारी तथा विद्यार्थीबाट स्वेच्छिक रूपमा संकलन गरिएको रकम प्याब्सन मधेश प्रदेशका अध्यक्ष गणेश साहलाई हस्तान्तरण गरिएको हो ।
उक्त रकम प्याब्सन मधेश प्रदेशमार्फत प्याब्सन केन्द्र हुँदै प्रधानमन्त्री राहत कोषमा जम्मा गरिने जनाइएको छ । प्याब्सन पर्साका जिल्ला सचिव अशोक संग्रौलाका अनुसार यो पहिलो चरणको सहयोग हो । दोस्रो चरणमा बाँकी विद्यालयबाट समेत सहयोग संकलन गरी राहत कोषमा थप रकम उपलब्ध गराइनेछ । विद्यालय समुदायबाट अभिभावक, शिक्षक र विद्यार्थीले स्वेच्छिक रूपमा रकम जुटाएर बाढीपीडितका लागि सहयोग गर्नुले विपद्को समयमा सामाजिक उत्तरदायित्वप्रतिको प्रतिबद्धता देखाएको छ ।
रक्तदानमार्फत पनि बाढीपीडितलाई साथ
भोटेकोशी बाढीबाट प्रभावित नागरिकको सहयोगार्थ बाराको जीतपुरसिमरा उपमहानगरपालिका–१ पथलैयामा ५० जनाले रक्तदान गरेका छन् । वडा कार्यालयको सहयोगमा पथलैया युवा जागरण क्लब र पथलैया दिव्यज्योती क्लबले मंगलबार आयोजना गरेको रक्तदान कार्यक्रममा १२ महिलासहित ५० जनाले रक्तदान गरेका हुन् ।
रक्त सञ्चार केन्द्र वीरगंजका प्राविधिक प्रमुख सौरभराज पाण्डेका अनुसार कार्यक्रममा उत्साहजनक सहभागिता रहेको थियो । विपद्का बेला खाद्यान्न तथा आर्थिक सहयोगसँगै रगतको आवश्यकता पनि उत्तिकै महत्वपूर्ण हुने भएकाले रक्तदान कार्यक्रममार्फत समेत प्रभावित नागरिकलाई सहयोग गर्ने प्रयास गरिएको आयोजकले जनाएको छ ।
चामलदेखि कम्बल र सेनेटरी प्याडसम्म राहत सामग्री
यसैबीच वीरगंज महानगरपालिका–१० का होटल व्यवसायी तथा समाजसेवी राजेश सिंहको अगुवाइमा संकलन गरिएको राहत सामग्री जेनजी पर्साका संयोजक महादेव प्रसाद कुर्मीलाई हस्तान्तरण गरिएको छ । बाढी प्रभावितका लागि संकलित सामग्रीमा २१ बोरा चामल, ७० प्याकेट चिउरा, २५ कार्टुन चाउचाउ, बिस्कुट, जुत्ता–चप्पल, कपडा, कम्बल तथा सेनेटरी प्याडलगायतका सामग्री रहेका छन् । राहत सामग्री बुझ्दै संयोजक कुर्मीले संकलित सामग्री दुई–तीन दिनभित्र प्रभावित क्षेत्रमा पुर्याएर बाढीपीडित परिवारलाई वितरण गरिने बताएका छन् ।
विपद्मा पर्साको एउटै सन्देशः पीडितलाई एक्लो नछाडौँ
भोटेकोशी बाढीले ठूलो जनधनको क्षति पुर्याएको अवस्थामा प्रभावित परिवारको उद्धार, राहत र पुनःस्थापनाका लागि राज्यको प्रयाससँगै नागरिकस्तरबाट भइरहेको सहयोगले मानवीय एकताको बलियो सन्देश दिएको छ ।
बहुदरमाई नगरपालिकाको २५ लाख ११ हजार १ सय रुपैयाँ, प्याब्सन पर्साको १५ लाख रुपैयाँ, पथलैयामा गरिएको रक्तदान तथा वीरगंजबाट पठाउन तयारी गरिएको खाद्यान्न, कपडा र अत्यावश्यक सामग्रीले एउटै कुरा देखाएको छ ‘विपद्को पीडा भौगोलिक सीमाभन्दा ठूलो हुन्छ र त्यसको सामना सामूहिक एकताबाट मात्रै सम्भव हुन्छ ।’
स्थानीय तह, शैक्षिक क्षेत्र, युवा क्लब, व्यवसायी तथा सर्वसाधारणबाट भइरहेको सहयोगलाई व्यवस्थित रूपमा प्रभावित परिवारसम्म पुर्याउनु अब उत्तिकै महत्वपूर्ण छ । राहत सामग्री वास्तविक पीडितसम्म पुग्ने, पारदर्शी रूपमा वितरण हुने र तत्कालको आवश्यकतासँग मेल खाने व्यवस्था सम्बन्धित निकायले सुनिश्चित गर्नुपर्ने देखिन्छ ।
भोटेकोशीको बाढीले घर, परिवार र जीवनमा ठूलो क्षति पुर्याएको छ । यस्तो विपद्मा राहतको प्रत्येक रुपैयाँ, प्रत्येक बोरा खाद्यान्न, प्रत्येक थोपा रगत र प्रत्येक सहयोगी हात पीडितका लागि आशाको आधार बन्न सक्छ । पर्सा र बाराबाट उठेको सहयोगको यो लहरले विपद्मा पीडितलाई एक्लो नछाड्ने सामाजिक प्रतिबद्धतालाई थप बलियो बनाएको छ ।
प्रतिक्रिया दिनुहोस् !