बाढीको तथ्यांकमै अन्योलः प्रहरी र प्राधिकरणको बेपत्ता संख्या फरक

वीरगंज (पर्सा), २१ भदौ । रसुवा–भोटेकोशी बाढीमा बेपत्ता तथा मृत्यु भएकाहरूको विवरण सार्वजनिक गर्ने क्रममा सरकारी निकायबीच नै तथ्याङ्कमा ठूलो अन्तर देखिएको छ । नेपाल प्रहरी र राष्ट्रिय विपद् जोखिम न्यूनीकरण तथा व्यवस्थापन प्राधिकरणले एउटै घटनासम्बन्धी फरक–फरक संख्या सार्वजनिक गरेपछि पीडित परिवारसँगै सर्वसाधारणमा समेत अन्योल बढेको छ ।

नेपाल प्रहरीले आइतबार बिहान ७ बजेर ४० मिनेटमा सार्वजनिक गरेको ‘रसुवा भोटेकोशी बाढीसम्बन्धी खोज तथा उद्धार अपडेट’मा बेपत्ता हुनेको संख््या ४ हजार ४० उल्लेख गरेको थियो । त्यसको करिब तीन घण्टापछि राष्ट्रिय विपद् जोखिम न्यूनीकरण तथा व्यवस्थापन प्राधिकरणले सार्वजनिक गरेको विवरणमा भने ४ हजार ९९६ जना बेपत्ता अर्थात् सम्पर्कविहीन रहेको उल्लेख छ ।

यसअनुसार एउटै दिन सार्वजनिक दुई सरकारी तथ्याङ्कबीच बेपत्ताको सङ्ख्यामा मात्रै ९५२ जनाको अन्तर देखिएको छ । मृतकको विवरणमा पनि यस्तै असमानता देखिएको छ । प्रहरीले शनिबार सार्वजनिक गरेको विवरणमा बाढी तथा पहिरोमा परी मृत्यु भएकाको सङ्ख्या १ हजार ३४१ उल्लेख थियो । प्राधिकरणले भने सोही दिन मृतकको संख््या १ हजार ३३१ सार्वजनिक गरेको थियो ।

भदौ १० गतेदेखि नै दुवै निकायबाट सार्वजनिक हुँदै आएका विवरणमा फरक देखिँदै आएको छ । राज्यका जिम्मेवार निकायबाट एउटै घटनाको तथ्यांक फरक–फरक आउँदा वास्तविक अवस्था कुन हो भन्नेमा सर्वसाधारण अन्योलमा परेका छन् । नेपाल प्रहरीका प्रवक्ता एवं डीआइजी अभिनारायण काफ्ले भने प्रहरीबाट सार्वजनिक हुने तथ्याङ्क तथ्यपरक रहेको दाबी गर्छन् । उनका अनुसार देशभर प्रहरीको सञ्जाल रहेकाले स्थानीय तहदेखि प्राप्त सूचनाका आधारमा तथ्य तथा तथ्यांक संकलन गरिन्छ ।

प्राधिकरणले भने प्रहरीसँगै सशस्त्र प्रहरी र नेपाली सेनाबाट समेत विवरण संकलन गर्ने भएकाले फरक निकायबाट प्राप्त विवरण दोहोरिन सक्ने र त्यसका कारण संख््या फरक पर्न सक्ने काफ्लेको भनाइ छ । प्रवक्ता काफ्लेले प्रहरीले अधिकांश विवरण आवश्यक पुष्टि गरेर मात्रै सार्वजनिक गर्ने गरेको बताएका छन् । एउटै घटनाका विषयमा विभिन्न व्यक्तिले छुट्टाछुट्टै सूचना दिएमा पनि तथ्याङ्क दोहोरिन सक्ने उनको भनाइ छ ।

प्रहरीले अहिले बेपत्ता व्यक्तिहरूको नामसहित विवरण सङ्कलन गरिरहेको जनाउँदै केही दिनभित्र थप यकिन तथ्याङ्क आउने काफ्लेले बताएका छन् । यता प्राधिकरणकी प्रवक्ता शान्ति महतले पनि बेपत्ता तथा मृतकको विवरण सुरक्षा निकायबाटै प्राप्त हुने भएकाले एउटै व्यक्तिको विवरण विभिन्न स्रोतबाट आउँदा दोहोरिन सक्ने बताएकी छन् । उनका अनुसार यही कारण तथ्याङ्कमा केही तलमाथि हुन सक्ने अवस्था रहेको छ ।