गौर (रौतहट), २० भदौ । रौतहटका एक नेपाली नागरिक भारतको बिहारमा चोरीको मोटरसाइकलसहित पक्राउ परेका छन् । नेपाल–भारत सीमावर्ती क्षेत्रमा सवारीसाधन जाँच गर्ने क्रममा झरोखर थानाको प्रहरीले रौतहटको गुजरा नगरपालिका–१, बलुवा निवासी २५ वर्षीय शेख कलीमुल्लाहलाई नियन्त्रणमा लिएको हो ।
भारतीय प्रहरीका अनुसार शुक्रबार छितरौली गाउँनजिकै गरिएको नियमित जाँचका क्रममा कलीमुल्लाहले चलाएको मोटरसाइकल शंकास्पद देखिएपछि एचएचडी मेसिनबाट सवारीसाधनको चेसिस नम्बर र दर्ता नम्बर परीक्षण गरिएको थियो । परीक्षणका क्रममा दुवै नम्बर आपसमा नमिलेको पाइएपछि प्रहरीले थप अनुसन्धान अघि बढाएको थियो ।
अभिलेखसँग विवरण मिलाउँदा उक्त मोटरसाइकल चोरीको भएको खुलेको भारतीय प्रहरीले जनाएको छ । प्रहरीका अनुसार मोटरसाइकल मुजफ्फरपुरस्थित सदर थानामा काण्ड नम्बर ७९१/२१ अन्तर्गत चोरीसम्बन्धी मुद्दा दर्ता भई खोजी सूचीमा रहेको थियो ।
सवारीसाधन चोरीको भएको पुष्टि भएपछि प्रहरीले कलीमुल्लाहलाई पक्राउ गरेको हो । सीमावर्ती क्षेत्रमा चोरीका मोटरसाइकलको नम्बर प्लेट तथा चेसिस नम्बर परिवर्तन गरेर एक ठाउँबाट अर्को ठाउँमा लैजाने गतिविधि हुने गरेको आशंकाबीच पछिल्लो पक्राउलाई भारतीय प्रहरीले सीमाक्षेत्रमा बढाइएको निगरानीको परिणामका रूपमा लिएको छ ।
पक्राउ परेका कलीमुल्लाहको चोरीमा प्रत्यक्ष संलग्नता छ कि छैन तथा चोरीको मोटरसाइकल उनीसम्म कसरी आइपुग्यो भन्ने विषयमा भारतीय प्रहरीले थप अनुसन्धान गरिरहेको जनाएको छ । घटनामा आवश्यक कानुनी प्रक्रिया समेत अघि बढाइएको छ ।
प्रतिक्रिया दिनुहोस् !