जनकपुरधाम (धनुषा), १९ भदौ । रसुवाको भोटेकोशी नदीमा आएको भीषण बाढीबाट प्रभावितका नाममा राहत संकलन गर्ने बहानामा हुन सक्ने अवैध तथा अव्यवस्थित गतिविधि रोक्न धनुषा जिल्ला विपद् व्यवस्थापन समितिले कडाइ गरेको छ । समितिको बुधबार बसेको बैठकले निजी बैंक खाता तथा क्यूआरमार्फत राहतका नाममा रकम संकलन नगर्न सम्बन्धित निकायलाई निर्देशन दिएको हो । समितिले राहतका नाममा स्वदेश तथा विदेशमा रहेका नागरिकसँग निजी बैंक खाता वा क्यूआर कोडमार्फत रकम उठाउने कार्य तत्काल रोक्न आग्रह गरेको छ । त्यस्तै, पुराना कपडा, अखाद्य वस्तु, छिट्टै बिग्रिने सामग्री तथा प्रयोगमा नआउने सामान संकलन नगर्न समेत निर्देशन दिइएको छ ।
राहत संकलनका नाममा त्यस्तो गतिविधि गरेको पाइएमा स्थानीय प्रशासनले कानुनबमोजिम कारबाही गर्ने चेतावनी दिएको छ । विपद् प्रभावितका लागि सहयोग जुटाउँदा वास्तविक आवश्यकता र आधिकारिक माध्यमलाई प्राथमिकता दिन समितिले सबैलाई आग्रह गरेको छ । आर्थिक सहयोग गर्न इच्छुक व्यक्ति तथा संस्थालाई प्रधानमन्त्री दैवी प्रकोप उद्धार कोषको आधिकारिक बैंकिङ प्रणालीमार्फत सहयोग गर्न समितिले अनुरोध गरेको छ । सहयोग गरेपछि त्यसको जानकारी जिल्ला प्रशासन कार्यालयलाई समेत गराउन आग्रह गरिएको छ । बैठकले रसुवा, नुवाकोट, धादिङ, गोरखा र तनहुँमा बाढीपहिरोबाट प्रभावित नागरिकको राहत तथा पुनःस्थापनाका लागि धनुषाका सरकारी निकाय, राजनीतिक दल, निजी क्षेत्र, नागरिक समाज, संघसंस्था तथा सर्वसाधारणलाई सहयोगका लागि आह्वान गरेको छ ।
भोटेकोशीमा आएको बाढीबाट धनुषाका नागरिकसमेत प्रभावित भएको हुनसक्ने भन्दै बैठकले उनीहरूको तत्काल खोजी तथा उद्धारका लागि सम्बन्धित निकायसँग आवश्यक समन्वय गर्न अनुरोध गर्ने निर्णय गरेको छ । बाढीमा परी मृत्यु भएका धनुषाका नागरिकका परिवारले शव आफ्नो स्थायी घरठेगानामा ल्याएर परम्पराअनुसार अन्त्येष्टि गर्न चाहेमा सम्बन्धित स्थानीय तहले आवश्यक सहयोग गर्ने निर्णयसमेत बैठकले गरेको छ ।
राहतका रूपमा खाद्यान्न, लत्ताकपडा, औषधिलगायत सामग्री उपलब्ध गराउँदा पहिले आवश्यकताको पहिचान गरेर मात्र सामग्री संकलन गर्नुपर्ने निर्णय गरिएको छ । समितिका संयोजक तथा प्रमुख जिल्ला अधिकारी प्रेमप्रसाद लुइटेलका अनुसार राहत सामग्री संकलन गर्दा तोकिएका फोकल पर्सनसँग समन्वय गरी आवश्यक सामग्री मात्र जुटाउनुपर्नेछ । समितिले राहत सामग्रीको ढुवानी तथा व्यवस्थापनलाई समेत व्यवस्थित बनाउन सम्बन्धित निकायलाई निर्देशन दिएको छ । साथै, मनसुनजन्य विपद्बाट हुनसक्ने क्षति न्यूनीकरणका लागि जिल्लाका सरकारी तथा सम्बन्धित निकायलाई पूर्वतयारी र प्रतिकार्यमा समन्वयात्मक रूपमा परिचालन हुन निर्देशन दिइएको छ ।
यसैबीच, धनुषामा बाढी तथा डुबानको जोखिम बढाउन सक्ने नदी तथा खोल्सीको अवस्थाबारेपनि समितिले चासो देखाएको छ । जलस्रोत तथा सिँचाइ विकास डिभिजन, जनकपुरधामको कार्यक्षेत्रभित्र पर्ने नदी तथा खोलामा बाढीका कारण जोखिममा रहेका स्थानमा तत्काल नदी नियन्त्रण तथा मर्मतसम्भारका काम अघि बढाउन सम्बन्धित निकायलाई अनुरोध गरिएको छ ।
प्रतिक्रिया दिनुहोस् !