वीरगंज (पर्सा), १७ भदौ । चाचान समूहका अध्यक्ष, वीरगंजका वरिष्ठ उद्योगपति तथा समाजसेवी बाबुलाल चाचानले विपद् प्रभावित नागरिकको राहत तथा उद्धारका लागि प्रधानमन्त्री दैवी प्रकोप उद्धार कोषमा ५२ लाख ११ हजार रुपैयाँ सहयोग गरेका छन् । चाचान समूहअन्तर्गतका विभिन्न उद्योग तथा प्रतिष्ठानबाट ५१ लाख रुपैयाँ र उनी अध्यक्ष रहेको मारवाडी सेवा ट्रस्ट वीरगंजबाट थप १ लाख ११ हजार रुपैयाँ गरी उक्त रकम कोषमा जम्मा गरिएको हो ।
चाचान समूहका अनुसार नारायणी आयल रिफाइनरीबाट ४१ लाख रुपैयाँ, नारायणी मोर्डन प्लस इन्डस्ट्रिजबाट ५ लाख रुपैयाँ तथा आदर्श पोली प्लास्टिक प्रालिबाट ५ लाख रुपैयाँ सहयोग गरिएको छ । तीनवटै प्रतिष्ठानबाट प्राप्त गरी कुल ५१ लाख रुपैयाँ प्रधानमन्त्री दैवी प्रकोप उद्धार कोषको एभरेस्ट बैंकस्थित खातामा जम्मा गरिएको जनाइएको छ ।
त्यसैगरी, मारवाडी सेवा ट्रस्ट वीरगंजका अध्यक्षसमेत रहेका चाचानले ट्रस्टका तर्फबाट १ लाख ११ हजार रुपैयाँ सहयोग गरेका हुन् । ट्रस्टले प्रदान गरेको सहयोग रकमको चेकसमेत प्रधानमन्त्री दैवी प्रकोप उद्धार कोषको खातामा जम्मा गरिएको महासचिव नरेन्द्र साहले जानकारी दिए ।
‘विपद्को समयमा सबै नेपाली एकजुट हुनुपर्छ’
सहयोग हस्तान्तरणपछि उद्योगपति चाचानले विपद् र संकटको समयमा पीडित नागरिकलाई सहयोग गर्नु सबैको साझा जिम्मेवारी भएको बताए । ‘यस्तो दैवी प्रकोप र विपद्को समयमा हामी सबै नेपाली एकजुट भएर एक–अर्कालाई सहयोग गर्नुपर्छ,’ उनले भने, ‘पीडित नागरिकको दुःखमा साथ दिनु हाम्रो सामाजिक दायित्व पनि हो ।’
विपद्बाट प्रभावित नागरिकको राहत, उद्धार तथा आवश्यक सहयोगमा सघाउने उद्देश्यले रकम प्रदान गरिएको चाचान समूहले जनाएको छ । उद्योगी–व्यवसायी तथा सामाजिक संस्थाले संकटका बेला मानवीय सहयोगमा महत्वपूर्ण भूमिका निर्वाह गर्नुपर्नेमा जोड दिँदै चाचान समूह र मारवाडी सेवा ट्रस्टले आगामी दिनमा पनि आवश्यकताअनुसार सहयोगलाई निरन्तरता दिने प्रतिबद्धता जनाएका छन् ।
प्रतिक्रिया दिनुहोस् !