वीरगंज (पर्सा), ११ भदौ । अग्रगामी मोर्चाको पर्सा जिल्ला स्तरीय (सात दलीय) बैठक बहुजन एकता पार्टीका पर्सा जिल्ला इन्चार्ज सन्तोष रामको अध्यक्षतामा वीरगंजमा सम्पन्न भएको छ । बैठकले मोर्चालाई थप व्यवस्थित र प्रभावकारी बनाउँदै विभिन्न महत्वपूर्ण निर्णयहरू गरेको छ । बैठकबाट मोर्चामा आबद्ध प्रत्येक दलबाट समावेशी सिद्धान्तका आधारमा तीन–तीन जना सहभागी हुने गरी २१ सदस्यीय जिल्ला स्तरीय अग्रगामी मोर्चा गठन गर्ने निर्णय गरिएको छ ।
त्यसैगरी, रसुवा, नुवाकोटलगायतका जिल्लामा बाढी तथा पहिरोका कारण भएको जनधनको क्षतिप्रति बैठकले गहिरो दुःख व्यक्त गर्दै पीडितको राहत, उद्धार तथा पुनःस्थापनाका लागि राज्यका सम्पूर्ण संयन्त्र परिचालन गर्न सरकारसँग जोडदार माग गरेको छ । बैठकले आगामी असोज ३ गते वीरगंजमा मोर्चाका केन्द्रीय नेतृत्वको विशेष उपस्थितिमा आयोजना हुने भेला तथा प्रशिक्षण कार्यक्रमलाई भव्य र प्रभावकारी रूपमा सफल पार्ने निर्णयसमेत गरेको छ ।
बैठकमा प्रगतिशील लोकतान्त्रिक पार्टी (प्रलोपा)का मधेस प्रदेश अध्यक्ष अमिताभ बच्चन दास, जनता समाजवादी पार्टी (जसपा) पर्सा जिल्ला अध्यक्ष रामनरेश यादव, जनमत पार्टी पर्सा जिल्ला अध्यक्ष ओमप्रकाश सरार्फ, आम जनता पार्टीका जिल्ला अध्यक्ष विश्वराज पटेल, नेपाल संघीय समाजवादी पार्टीका इन्जिनियर रागीव हुसेन, प्रलोपा नेता बालकृष्ण श्रेष्ठ, जसपा उपाध्यक्ष श्रीराम गिरी, जनमत पार्टीका जिल्ला उपाध्यक्ष नागेन्द्र गुप्तालगायत नेताहरूको उपस्थिति रहेको थियो ।
बैठकले अग्रगामी मोर्चालाई जिल्लामा थप सशक्त, समावेशी र जनमुखी बनाउँदै आगामी कार्यक्रमहरूलाई प्रभावकारी रूपमा अघि बढाउने लगायतका निर्णयहरु भएको जनमत जिल्ला अध्यक्ष ओमप्रकाश सरार्फले बताए ।
प्रतिक्रिया दिनुहोस् !